Komil Allamjonov: «Avtomaktablar pul qilish bilan ovora. Natijada har oyda yo‘lga minglab «potensial qotillar» chiqariladi»

Uning qayd etishicha, bu o‘limlar soni voqea joyida halok bo‘lib, IIV hisobotiga kiritilgani. Yana qancha odamlar shifoxonada vafot etishi ham eslatib o‘tilgan.

“Bu o‘limlar soni voqea joyida halok bo‘lib, Ichki ishlar vazirligi hisobotiga kiritilgani. Yana qancha odamlar shifoxonada vafot etadi. Ularning soni va hisobini esa Sog‘liqni saqlash vazirligi yuritadi. Yana minglab insonlar bir umrga nogiron bo‘lib qolganini ham hisobga olsak, ahvol qay darajada dahshatligini tasavvur qilavering”, deydi Komil Allamjonov.

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi avtomaktablar haqida to‘xtalib o‘tdi.

“Avtomaktablar “soqqa” qilish bilan ovora. O‘qitish tizimi butunlay ishdan chiqqan. Amaliy darslar chala-chulpa o‘tiladi. Benzinga pul, darsga qatnashmaslik pul, imtihon pul. Natijada har oyda yo‘lga minglab "potensial qotillar" chiqariladi. Jamoatchilikni esa asosan monopoliya tashvishga soladi. 

Qani bu tanqidchilar, "Avtotest"ning yo‘q bo‘lib ketishi tarafdorlari? "Avtotest" yo‘q endi. Endi nega jimsizlar? Har holda eng kuchli va sifatli o‘qitadigan maktab edi. Bozor tamoyillari va raqobat sog‘lom bozorda bo‘lishi kerak. Sen belgilangan soatlarni to‘liq o‘qitib, bir tomchi benzinni urib qolmasdan mashinada amaliy darslarni soat soatigacha o‘tsang-u, boshqalar nomigagina dars o‘tib, arzon narx belgilab, pravani sotib o‘tirsa, shumi sog‘lom bozor? 

Monopoliya deb uvvos soldi ko‘pchilik. Mana, xohlagan tashkilotga o‘qitishga ruxsat berildi. Endi hammasi pul, o‘qitish nol, imtihonlar pul, lekin jamoatchilik jim. Tushunmayman sababini. Xullas...”, deyiladi Komil Allamjonovning munosabatida.

Avvalroq, IIV matbuot xizmati O‘zbekistonda joriy yil boshidan beri bugungi kunga qadar 6551ta yo‘l-transport hodisasi sodir etilganini ma'lum qilgandi.

Qayd etilishicha, 6551ta yo‘l-transport hodisasidan 1682tasi o‘lim bilan tugagan. Jarohat olganlar soni esa 5920 nafarni tashkil etadi. 

Ma'lum qilinishicha, yo‘l-transport hodisalarining deyarli 40 foizi tezlikni me'yoridan oshirish natijasidir. 

Fransiyaning O‘zbekistondagi muvaqqat ishlar vakili Bris Rokfey Alter Ego loyihasiga bergan intervyusida poytaxt Toshkentda yashash qanchalik qulayligini aytgandi.

«Rostini aytsam, mashinalar harakati qo‘rqinchli. Men rulda o‘tirganimda qo‘rqib ketaman. Sababi, qoidalar umuman yo‘q. Sizni o‘ng tomondan, chap tomondan quvib o‘tishlari mumkin. Hech kim burilish signallarini ishlatmaydi. Chiziqlar hurmat qilinmaydi, ya'ni chiziqlar bo‘yicha yurishmaydi. Chapga burilish ham qiyin. Bu men uchun qiyin. Menimcha, bu yerda baxsiz hodisalar ko‘p bo‘ladi», dedi diplomat.