Eskilar va yangilar bilan. O‘zbekiston boks jamoasi jahon chempionatiga yangilangan tarkibda boradi

26 oktyabrdan 6 noyabrga qadar Serbiyaning Belgrad shahrida boks bo‘yicha kattalar o‘rtasida jahon chempionati bo‘lib o‘tadi.

Musobaqada 13 xil vazn toifasida janglar o‘tkaziladi. 

Turizm va sport vazirligi O‘zbekiston boks jamoasining JCh—2021ga yo‘l oladigan tarkibini e'lon qildi. Rio Olimpiadasi kumush medali sohibi, jahon chempioni, 2018 yildan buyon professional boksda janglar o‘tkazib kelayotgan Shahram G‘iyosov hamda Olimpiada chempionlaridan biri, 2019 yilda professional boksda debyut qilgan Hasanboy Do‘stmatov jamoaga qaytgan.

Shuningdek, quyidagi bokschilar jahon chempionatiga yo‘l oladi: Nodirjon Mirzahmedov, Shahobiddin Zoirov, Mirazizbek Mirzaxalilov, Abdumalik Halokov, Mujibullo Tursunov, Asadxo‘ja Mo‘ydinxo‘jayev, Saidjamshid Ja'farov, Odiljon Aslonov, Shohjahon Abdullayev, Madiyor Saidrahimov, Lazizbek Mullajonov.

E'tiborli jihati, O‘zbekiston jahon chempionatiga deyarli to‘liq yangilangan tarkib bilan yo‘l olgan. Tokio Olimpiadasida qatnashgan tarkibdan faqat ikki bokschi, yengil vazn toifalari vakillari - Mirzaxalilov va Zoirov qolgan (bu ikki bokschi ham Olimpiadani hakamlarning bahsli qarorlariga ko‘ra tark etishga majbur bo‘lgandi). 

Elnur Abduraimov, Bobousmon Baturov, Fanat Qahramonov, Dilshod Ro‘zmetov, Sanjar Tursunov va Bahodir Jalolov tarkibga jalb etilmagan. Yangi tarkibdagi sakkiz nafar bokschi uchun bu ilk jahon chempionati bo‘ladi.

Yangilangan jamoaga To‘lqin Qilichev emas, Marat Qurbonov bosh murabbiy bo‘lgan.

Qayd etish kerakki, Qilichev rahbarligida jamoa Tokioda muvaffaqiyatsizlikka uchragan, erkaklar jamoasidagi 8 bokschidan faqat bir nafari - Bahodir Jalolov finalgacha yetib borib, oltin medalni qo‘lga kiritgandi.

Ma'lumot uchun, 2019 yilda Yekaterinburgda o‘tkazilgan jahon chempionatida O‘zbekiston jamoasi uch oltin, bitta kumush va bitta bronza bilan umumjamoa hisobida birinchi o‘rinni egallagandi.