Davlat xaridlari ishtirokchilari dastlabki tanlovdan o‘tadi

Davlat aktivlarini boshqarish agentligi va Moliya vazirligining qarori bilan korporativ buyurtmachilarning xarid komissiyalari tomonidan dastlabki malaka tanlovini o‘tkazish tartibi to‘g‘risidagi namunaviy nizom tasdiqlandi.

Nizomda quyidagi tushunchalar qo‘llaniladi:

• korporativ buyurtmachi – davlat xaridlarini amalga oshirish jarayonlari alohida tartibda nazorat qilinadigan ayrim korporativ va budjet buyurtmachilari ro‘yxatida ko‘rsatilgan buyurtmachilar;
• xarid komissiyasining mas'ul kotibi – xarid komissiyasining tezkor faoliyatini tashkil etuvchi ovoz berish huquqiga ega bo‘lmagan xodim;
• xarid qilish tartib-taomillari ishtirokchisi – xarid qilish tartib-taomilida qatnashishdan manfaatdor bo‘lgan, dastlabki malaka tanlovi uchun talabnoma taqdim etgan O‘zbekiston rezidenti yoki norezidenti bo‘lgan jismoniy yoki yuridik shaxs;
• talabnoma – ishtirokchining yuridik maqomi, moliyaviy, tijorat, texnik imkoniyatlari to‘g‘risidagi ma'lumotlarni o‘z ichiga olgan hujjatlar to‘plami.

Dastlabki malaka tanlovi xarid qilish tartib-taomilining bir qismi bo‘lib, uning natijasi davlat xaridlari to‘g‘risidagi shartnomani tuzish uchun asos hisoblanmaydi.

Dastlabki malaka tanlovi xarid qilish tartib-taomillarining quyidagi turlari orqali amalga oshiriladigan xaridlarga nisbatan qo‘llaniladi: eng yaxshi takliflarni tanlash; tender.

Dastlabki malaka tanlovidan muvaffaqiyatli o‘tgan salohiyatli ishtirokchilar bir yildan ortiq bo‘lmagan muddat davomida korporativ buyurtmachilarning tanlash va tenderlarida ishtirokchi sifatida qatnashishi mumkin.

Dastlabki malaka tanlovini o‘tkazishda ishtirokchilar tomonidan quyidagi hujjatlar taqdim etilishi lozim:

• ta'sis hujjatlari va davlat ro‘yxatidan o‘tkazilganligi to‘g‘risidagi guvohnoma;
• moliyaviy hisobotlar (tashqi auditor tashkilotlar tomonidan tasdiqlangan yoki soliq organlari tomonidan qabul qilinganligi tasdiqlangan holda);
• ekologik, gigiyenik sertifikatlash, kalibrlash to‘g‘risidagi tegishli guvohnomalar yoki sinov bayonnomalari, sifat sertifikatlari, muvofiqlik sertifikatlari, shu jumladan xavfsizlik talablariga muvofiqlik sertifikatlari, tovar (ish, xizmat)lar pasportlari;
• ishtirokchilarning ishbilarmonlik obro‘sini (ishchi-xodimlari malakasi, ish tajribasi, shu jumladan maxsus faoliyat bo‘yicha tajribasi) tasdiqlovchi hujjatlar.

Ishtirokchilar o‘z xohishiga ko‘ra faoliyatiga doir qo‘shimcha ma'lumotlar va hujjatlarni taqdim etishi mumkin. Ishtirokchilarni o‘rganish ular tomonidan taqdim qilingan talabnomalar, tasdiqlovchi hujjatlarni, shuningdek ishtirokchilar to‘g‘risidagi boshqa ma'lumotlarni tahlil qilish asosida amalga oshiriladi. Zaruriyat bo‘lganda, ishtirokchilarning ishlab chiqarish jarayoni va mahsulotlarini qo‘shimcha ravishda o‘rganish uchun xarid komissiya tomonidan texnik audit o‘tkazish to‘g‘risida tegishli qaror qabul qilinishi mumkin.

Dastlabki malaka tanlovi natijalari xarid komissiyasining bayonnomasi bilan rasmiylashtiriladi. Malaka tanlovidan o‘tgan ishtirokchilar ro‘yxati korporativ buyurtmachilar tomonidan yuritiladi.