22 kun ichida 400 mingdan ortiq xonadon iste'moliga teng gaz o‘g‘irlangan – Energetika vazirligi

Tabiiy gazdan noqonuniy foydalanish gaz ta'minoti korxonalariga qariyb 4 milliard so‘m zarar yetkazgani aytilmoqda.

Foto: Energetika vazirligi matbuot xizmati

Energetika vazirligi oktyabr oyining 22 kunida gazdan noqonuniy foydalanish holatlari yuzasidan ma'lumotlarni e'lon qildi.

O‘tkazilgan o‘rganishlar davomida respublika bo‘yicha tabiiy gazdan 228 ta holatda noqonuniy foydalanib kelinayotgani aniqlangan.

22 kun ichida 4 million 278 ming kub metr tabiiy gaz noqonuniy foydalanilgani ma'lum bo‘ldi. Buning natijasida gaz ta'minoti tashkilotlariga yetkazilgan zarar 3 milliard 832 million 900 ming so‘mni tashkil qilgan.

Taqqoslash uchun, ushbu hajmdagi tabiiy gaz hozirgi kunda 427 ming 830 ta xonadonning 1 kunlik iste'molini tashkil qiladi.

Boshqacha aytganda, ushbu hajmdagi tabiiy gaz Namangan va Andijon viloyatlaridagi jami aholi xonadonlarining bir kunlik iste'molini tashkil qiladi.

Ushbu noqonuniy foydalanish holatlarining eng ko‘pi Namangan, Toshkent va Xorazm viloyatlariga to‘g‘ri keladi.

“Aniqlangan holatga huquqiy baho berish uchun rasmiylashtirilgan hujjatlar huquqni muhofaza qilish organlariga yuborildi”, – deyiladi vazirlik xabarida.

Avvalroq, 9 oyda 78 000 000 000 so‘mlik tabiiy gaz o‘g‘irlangani xabar qilingandi.