Tursunali Qo‘ziyev Madaniy meros agentligiga rahbar etib tayinlandi

Qayd etilishicha, Tursunali Qo‘ziyev 2021 yilning 5 noyabridan Turizm va sport vazirligi huzuridagi Madaniy meros agentligi direktori vazifasini bajaruvchisi sifatida ish boshlagan.

Tursunali Qo‘ziyev 1954 yil Surxondaryo viloyatida tug‘ilgan, grafik rassom, kandakor, foto san'ati ustasi. Benkov nomidagi Respublika rassomlik bilim yurti (1976) va Toshkent teatr va rassomlik san'ati institutini (1982) tugatgan.

U ish faoliyati davomida Respublika rassomlik bilim yurti direktori (1993—95), prezident devoni mas'ul xodimi (1995—96), madaniyat ishlari vazirining birinchi o‘rinbosari (1996—97), Badiiy akademiya raisi bo‘lib ishlagan. 1999 yilda O‘zbekiston Respublikasi san'at arbobi unvoni bilan taqdirlangan.

Avvalroq, Vazirlar Mahkamasi tomonidan «Turizm va sport vazirligi huzuridagi Madaniy meros agentligi to‘g‘risidagi nizomni tasdiqlash haqida»gi qaror qabul qilingandi.

Quyidagilar agentlikning vazifalari etib belgilandi: moddiy madaniy meros obektlari davlat reyestri, elektron katalogi, pasporti va davlat kadastrini yuritish; moddiy madaniy merosning ko‘chmas mulk obektlarida asrashga doir ishlarni amalga oshirish, buyurtmachi funksiyasini bajarish; milliy muzey fondining davlat katalogini yuritish; tarixiy-madaniy hududlarni muhofaza qilish; arxeologiya tadqiqotlarini qo‘llab-quvvatlash, arxeologiya merosi obektlarini muhofaza qilish; madaniy boyliklarni muhofaza qilish, shu jumladan ularning O‘zbekiston hududidan olib chiqilishi va uning hududiga olib kirilishi bo‘yicha sertifikat berish va boshqalar.