Foto: Yakkabog‘ tumani hokimining Captiva’si YTHga uchradi

Yakkabog‘ tumani hokimligi axborot xizmati rahbari Sherzod Hasanovning Kun.uz’ga ma'lum qilishicha, hodisa 2021 yil 7 noyabr kuni sodir bo‘lgan. Yakshanba, dam olish kuni bo‘lgani uchun mashina yo‘l-transport hodisasiga uchragan paytda uning ichida tuman hokimi bo‘lmagan.

Captiva mashinasini boshqarib ketayotgan hokimning haydovchisi boshqa mashinaga yo‘l beraman deb rulni keskin burgan va pastlikka tushib ketgan. Hodisa oqibatida hech kimga jiddiy jarohat yetmagan. Mashina jiddiy shikastlangan.

Yakkabog‘ tumani hokimi Captiva mashinasini joriy yil may oyida 311 million so‘mga sotib olishi ijtimoiy tarmoqlarda keng muhokamalarga sabab bo‘lgandi. Bunga sabab Vazirlar Mahkamasining «Davlat boshqaruvi va mahalliy davlat hokimiyati organlarida xizmat avtotransportlaridan foydalanish tizimini tubdan takomillashtirish chora-tadbirlari to‘g‘risida»gi qarorida tuman va shahar hokimlari xizmat avtotransportining eng yuqori narxi – BHMning 1000 baravari (hozir 245 million so‘m)dan oshmasligi aytilgan.

O‘shanda viloyat hokimligi munosabat bildirgan va Yakkabog‘da Vazirlar Mahkamasining qaroriga zid ravishda 311 million so‘mga Captiva mashinasi sotib olinayotganiga izoh bergandi.

«Qarorning 1-ilovasida «Borish qiyin bo‘lgan va tog‘li tumanlar hokimlari uchun xizmat avtotransport vositasini xarid qilishda dvigatelning eng yuqori quvvati 3 000 sm3 gacha oshirilishiga ruxsat etiladi», deb qo‘shimcha qilib ketilgan. Yakkabog‘ tumanining 62,7 foiz maydoni tog‘li hududlar hissasiga to‘g‘ri keladi. Shu sababli «Captiva» avtomashinasi xarid qilish qonunga zid emas, deb topilgan», deyilgandi viloyat hokimligi munosabatida.