«EXPO 2020 Dubay»: O‘zbekiston BAAda keng ko‘lamli madaniy dasturni taqdim etadi

Dubaydagi «Expo-2020» butunjahon ko‘rgazmasida so‘nggi yillarda mamlakat ilmiy va iqtisodiy yutuqlari, madaniy merosi va sayyohlik salohiyati, shuningdek, Yangi O‘zbekistonni rivojlantirish rejasi, investitsiya imkoniyatlari keng xalqaro jamoatchilikka namoyish etilayotgan O‘zbekiston Milliy paviloni o‘z ishini amalga oshirmoqda.

Dubaydagi butunjahon ko‘rgazmasi faoliyati davomida Madaniyat va san'atni rivojlantirish jamg‘armasi O‘zbekiston Milliy paviloni bilan hamkorlikda mamlakat madaniy va sayyohlik salohiyatini xalqaro maydonda ilgari surishga qaratilgan qator tadbirlarni taqdim etadi.

«Expo 2020 Dubai» jahon ko‘rgazmasi 2022 yilning 31 martigacha bo‘lgan davrda butun dunyo bo‘ylab 25 millionga yaqin mehmonlarni qabul qilishi rejalashtirilgan.

Madaniyat va san'atni rivojlantirish jamg‘armasi Kengashi raisi o‘rinbosari Saida Mirziyoyeva:

«Bugun O‘zbekiston dunyoga ochiq, ijobiy tajriba orttirishga tayyor hamda o‘z tajribasi bilan mamnuniyat ila o‘rtoqlashar ekan, yurtimizning madaniy salohiyatini xalqaro maydonda samarali targ‘ib etish uchun yangi poydevor qo‘ymoqdamiz. 2022 yilda O‘zbekiston va BAA o‘rtasida diplomatik munosabatlar o‘rnatilganining 30 yilligini nishonlaymiz. Bu, bizni bir-birimizga ishonish, yangi yutuqlarga ilhomlantirish, turli darajalarda va sohalarda o‘zaro muloqot qilishni o‘rgatgan uch samarali o‘n yilliklar edi. Shuning uchun, O‘zbekistonni «EXPO 2020 Dubay» jahon ko‘rgazmasida ishtirok etishi — bu Birlashgan Arab Amirliklari-tashkilotchi mamlakat va boshqa ishtirokchi mamlakatlar bilan yuqori darajadagi muloqotga qo‘shimcha sur'at baxsh etadigan muhim voqeadir».

2021 yilning 27 noyabr. «Dubai Opera» sahnasida «Lazgi – qalb va muhabbat raqsi» baletining xalqaro taqdimoti

Xalqaro auditoriyaga o‘zbek xalqining asl an'analarini namoyish etgan Xorazm raqsining mutlaqo yangi talqini taqdim etiladi. «Lazgi – qalb va muhabbat raqsi» baletining sahnalashtirilishi O‘zbekiston baletini yangi bosqichga olib chiqdi va ilk bor dunyo bo‘ylab sayohatini boshlaydi. Birinchi marta O‘zbekistonning eng mashhur raqslaridan biri, madaniy meros va tarixi «Dubai Opera» ko‘p formatli san'at markazi sahnasida namoyish etiladi.

Xoreograf Raymondo Rebek tomonidan sahnalashtirilgan hamda Alisher Navoiy nomidagi Davlat akademik katta teatri balet truppasi ijro etgan spektaklning ilk taqdimoti joriy yilning 5 sentyabr kuni Toshkentda, YuNESKO homiyligida bo‘lib o‘tdi hamda professional hamjamiyatning yuksak e'tirofi va bahosiga sazovor bo‘ldi.

2019 yilning 12 dekabr kuni YuNeSKOning nomoddiy madaniy merosni muhofaza qilish bo‘yicha hukumatlararo qo‘mitasi «Xorazm raqsi - lazgi»ni insoniyatning nomoddiy madaniy merosi vakillik ro‘yxatiga kiritdi.

2021 yil 29 noyabr. «EXPO 2020 Dubai» butunjahon ko‘rgazmasi Ayollar pavilonida O‘zbekistonning «Jamiyat ijtimoiy hayotini modernizatsiyalashda xotin-qizlarning o‘rni» mavzusidagi sessiyasi

«EXPO 2020» ko‘rgazmasida Cartier Women’s Initiative bilan hamkorlikda maxsus Ayollar paviloni ochildi. Ushbu pavilon ayollar va ularning global masalalardagi o‘rniga bag‘ishlangan. Ayollar paviloni – tajriba almashish va gender tengligini o‘rnatish uchun ishlangan strategiyalarni ilgari surish uchun xalqaro maydonchadir. Birlashgan Arab Amirliklari gender balansi kengashi raisi Manal bint Muhammad bin Rashid Al Maktum – bosh vazir o‘rinbosari va prezident ishlari bo‘yicha vazir Shayx Mansur bin Zoid Al Nahayanning rafiqasi tomonidan tashkillashtirilgan.

Ayollar paviloni – bu jamiyatda ayollarning rolini kuchaytirishni qo‘llab-quvvatlash maqsadidagi konstruktiv muloqotlarni o‘tkazish va rivojlantirish bo‘yicha jahon yetakchilari va mutaxassislarni uchrashtiradigan maydondir. Ushbu pavilon «Expo 2020»ning gender tengligi va ayollarning huquq va imkoniyatlarini kengaytirishga sodiqligini tasdiqlaydigan ijodiy kontent va dasturlarni taqdim etadi. Shuningdek, pavilonda insoniyat tarixida va bugungi kunda ayollarning ahamiyatiga bag‘ishlangan «Yangi istiqbollar» ko‘rgazmasi namoyish etilmoqda.

Pavilonning asosiy maqsadi - ayollar gullab-yashnaganda butun insoniyat ham gullab-yashnashini ko‘rsatishdir.

29 noyabr kuni O‘zbekiston ayollar paviloni dasturi doirasida «Jamiyatning ijtimoiy hayotini modernizatsiyalashda ayollarning o‘rni» mavzusida muhokama qiladi. Shuningdek, keyingi oylarda Madaniyat va san'atni rivojlantirish jamg‘armasi tomonidan «Madaniyat sohasida xotin-qizlarning o‘rni» mavzusiga bag‘ishlangan sessiya tashkil etiladi.

2021 yil 30 noyabr. «Jubilee Park EXPO 2020» sahnasida pianino ijrochisi Behzod Abduraimovning konsert dasturi

Pianino ijrochisi jamoatchilik e'tiboriga List, Betxoven, Shopen, Mussorgskiy, Prokofev va Chaykovskiylarning mashhur klassik asarlarini taqdim etadi.

Londondagi xalqaro pianinochilar tanlovi g‘olibi Behzod Abduraimov, V.A. Uspenskiy nomidagi Respublika ixtisoslashtirilgan musiqa litseyida va Kansas-Siti shahridagi «Park» universiteti qoshidagi xalqaro musiqa markazida tahsil olgan.

Abduraimov so‘nggi mavsumlarda London, Los-Anjyeles va Myunxen filarmoniya orkestrlari, London simfonik orkestri, NHK simfonik orkestri (Yaponiya), Konsertgebau Qirollik orkestri, BBC Shotlandiya simfonik orkestri, Oslo filarmoniya orkestri bilan konsert dasturlarida ishtirok etgan. Pianinochi konsert dasturlari AQSh, Yevropa va Osiyo mamlakatlarida zallarni to‘liq to‘playdi.

2021 yil 19-21 dekabr kunlari. Al Burda festivali

Madaniyat va san'atni rivojlantirish jamg‘armasi «EXPO 2020» doirasida 19-21 dekabr kunlari bo‘lib o‘tadigan «Al Burda» festivalida ishtirok etadi hamda O‘zbekiston xalq musiqali ijodiyoti, yurtimiz filmlarini namoyish etadi, shuningdek, «Shahar hayoti: Islom makonini o‘zgartirish» mavzusidagi panel muhokamasida ishtirok etadi.

«Al Burda» - Birlashgan Arab Amirliklarining madaniyat va taraqqiyot vazirligi homiyligida ishlaydigan ko‘p tarmoqli platformadir. Bu ijodiy rahbarlar, olimlar, rassomlar va jamoa a'zolari uchun hamkorlik qilish, fikr almashish va Islom san'ati va madaniyati g‘oyalarini birgalikda yaratish uchun global makondir. Festivalning maqsadi – yosh avlodlarni o‘z madaniy boyliklarini yanada chuqurroq o‘rganishlarini hamda jamiyatda Islom madaniyatining o‘rnini mustahkamlashdan iborat.