1-2 dekabr kunlari ayrim hududlarda yana changli bo‘ron yuz beradi - O‘zgidromet

Dekabr oyining ilk kunlarida respublikaning ayrim viloyat va tumanlarida chang bo‘roni va chang-g‘uborlar ko‘tarilishi mumkin. Bu haqda O‘zgidromet xabar berdi.

1-2 dekabr kunlari O‘zbekiston hududiga Turkmaniston orqali Eron hududlaridan juda iliq va quruq havo kirib kelishi kutilmoqda.

“Shu kunlari havo haroratining keskin ko‘tarilishi fonida respublika bo‘ylab shamol 17-22 m/s.gacha kuchayishi mumkin. Ayrim viloyat va tumanlarda changli bo‘ron va chang-g‘uborlari ko‘tarilishi kuzatilishi mumkin”, — deyiladi xabarda.

Noyabr oyining dastlabki kunlari respublikaning ayrim viloyatlarida va Toshkentda shunday holat kuzatilgan edi. 4 noyabr kechasida Toshkent havosida chang miqdori belgilangan miqdordagidan 30 barobargacha ortganligi aytildi. Bunday hodisa 150 yil mobaynida ilk marotaba yuz bergandi.

Yuz bergan chang bo‘roni oqibatida Toshkent shahrining qator hududlarida ichimlik suv ta'minoti bilan bog‘liq uzilishlar ro‘y berdi.

Sog‘liqni saqlash vazirligi aholini ogohlantirdi va bir kunda 700dan ortiq bemorlardan nafas olish bilan bog‘liq murojaatlar bo‘lganini aytdi.