13:08 / 06.12.2021
20911
Икки шаҳарда уч кун байрамга сабаб бўлган кубок. Футбол мавсумига якун ясаган финал қандай ўтди? 
Фото: ПФЛ

Якунланган ҳафтанинг дам олиш куни одатдагидек Европа футболи билан эмас, кўпроқ ўзбек футболидаги воқеалар билан ёдда қолди. Самарқандда ўтказилган Ўзбекистон кубоги финали доирасидаги «Пахтакор» ва «Насаф» тўқнашуви мамлакатимизда 2021 йилги футбол мавсумига расман якун ясаб берди. Шубҳасиз, кўҳна шаҳардаги финал ўзбек футболи тарихида ўйин жиҳатдан ҳам, ташкилий ва мухлислар эътибори билан ҳам энг зўр ўтган баҳсга айланди, десак муболаға бўлмайди. Tribuna.uz икки шаҳарда уч кун ҳақиқий байрамона муҳитга сабаб бўлган финалнинг майдон ташқарисидаги воқеаларидан репортаж тайёрлади.

Финал нега яна Самарқандда ўтказилди? 

Ўзбекистон кубоги финали тарихда учинчи марта Самарқандда ўтказилди. Ушбу мусобақа тарихидаги илк финал 1992 йилда айнан кўҳна кентда ўтказилган бўлса, 2016 йилги ҳал қилувчи баҳс ва ҳозирча сўнггиси бўлган бу йилги финал ҳам «Динамо» ўйингоҳида ўтказилди. Жорий мавсумнинг дастлабки расмий ўйини – Ўзбекистон Суперкубоги доирасидаги «Пахтакор» - «Насаф» (1:0) учрашуви ҳам кўҳна шаҳарда ўтказилгани сабабли, мавсумнинг охирги расмий ўйини бўлмиш кубок финали ҳам Самарқандга топширилгани кўпчиликка савол туғдириши табиий эди.

Фото: Tribuna.uz

Гап шундаки, финал мезбонлиги кубок гуруҳ босқичига қуръа ташлаш олдидан қуръа орқали аниқланганди. Ўшанда ОКМК, «Бунёдкор», «Пахтакор», «Локомотив», «Сурхон» ва «Динамо» клублари Ўзбекистон кубоги-2021 финалига мезбонлик қилиш бўйича ариза топширган ва қуръадан кейин финал Самарқандда ўтиши ойдинлашганди. Финалга «Пахтакор» ва «Насаф» йўл олгач, Тошкент ва қашқадарёлик мухлислар учун масофа жиҳатдан ҳам Самарқанд энг қулай нейтрал ўйингоҳ бўлиши аниқ эди.

Финалдан бир кун олдин бошланган байрам

Тан олиш лозим, мухлислар ва журналистлар томонидан жуда кўп танқидларга учрайдиган футболимиздаги икки ташкилот – ЎФА ва ПФЛ Ўзбекистон кубоги финалини юқори даражада ташкил этди. Умуман олганда, 2021 йилда ўтказилган қатор турнирларни юқори даражада ўтказган ПФЛ ва ЎФАнинг Самарқанд финалидаги ташкилий иши «торт устидаги олча» мисоли бўлди.

Фото: Tribuna.uz
Фото: Tribuna.uz

Финалдан бир кун олдин Самарқанд шаҳрида футбол байрами шукуҳи яққол сезила бошлади. Расмий тадбирлардан ташқари, Ўзбекистон кубоги соврини икки қаватли махсус автобусда Суперлигага йўлланма олган «Динамо» жамоаси мухлислари қуршовида шаҳар бўйлаб ҳаракатланиб, самарқандликлар учун финалга ўзига хос чақирув бўлди. Карнай-сурнай садолари остида «Динамо» стадиони олдида бошланган байрам шаҳарнинг юраги – Регистон майдонида давом этди.

Ҳамма йўллар Самарқандга олиб боради

4 декабрь, шанба куни финал олдидан кубок «Динамо» стадиони ва Регистон майдонига қўйилиб, соврин билан суратга тушиш имконияти яратилди.

Ўйиндан уч соат аввал – соат 13:00да «Динамо» стадионида байрам дастурлари бошланиб кетди. Маҳаллий мухлислардан ташқари, Тошкент ва қўшни Қашқадарёдан ҳам юзлаб ишқибозлар Самарқандга келишди. Учрашувдан қарийб икки соат аввал «Динамо» стадионининг «Насаф» мухлислари учун ажратилган секторлари лиқ тўлди, ўйиндан ярим соат аввал эса «Пахтакор» мухлислари ўз трибуналарини тўлдиришди. Ўйин бошлангач, қарийб 14 минг томошабин сиғимига эга ўйингоҳ футбол ихлосмандлари билан тўлди.

Фото: Tribuna.uz

Финал баҳси олдидан Ўзбекистон миллий жамоаси собиқ сардори Одил Аҳмедов олқишлар остида кубокни майдонга олиб тушди.

Фото: Tribuna.uz

Ўйингоҳнинг юқори мартабали меҳмонлар учун ажратилган қисмида ЎФА биринчи вице-президенти Равшан Эрматов, Ўзбекистон миллий жамоаси бош мураббийи Сречко Катанец, клублар раҳбарлари ва бошқаларни учратиш мумкин эди.

Фото: ПФЛ

«Қизил» бормиди?!» VAR, четлатиш ва иродали ғалаба

Финалда «Пахтакор» ҳисобни очгач, қолаверса, биринчи бўлимдаёқ қаршиликлар ўйинчиси Ойбек Бозоровнинг майдондан четлатилиши байрамона муҳитни бузиши мумкин эди. Сабаби «Пахтакор» ва «Насаф»нинг собиқ ўйинчиси бўлмиш бош ҳакам Аҳрол Рисқуллаевнинг VARдаги ассист Илгиз Танташев томонидан экран қаршисига чақирилиши ва Бозоровга баҳсли вазиятда қизил карточка кўрсатиши турли мунозараларга сабаб бўлаётганди.

Фото: Tribuna.uz

Буни танаффусдаёқ ЎФА ҳакамлар қўмитаси раиси Эркин Бахтиёровнинг такрорий вазиятни кўриш учун журналистлар хонасига чиқиши ва ҳайрон қоларли оҳангда «қизил» бормиди?!» дея сўрагани, қолаверса ЎФА фахрийлар кенгаши Тўлаган Исоқовнинг бундай финалларда бунақа вазиятлар учун четлатиш ноўрин экани ҳақидаги гапларидан англаш мумкин эди.

Фото: Tribuna.uz

Қарийб бир соат камчиликда ўйнаган Рўзиқул Бердиев шогирдлари ўйинда қаҳрамонлик кўрсата олишди ва якунда ғалаба голини киритган ҳолда «Динамо» ўйингоҳини ларзага келтиришди. Бу ғолиблик кубок билан бирга уларга ОЧЛ йўлланмасини ҳам тақдим этди.

Шу куни деярли бутун ўйингоҳдагилар «Насаф»ни фақат «Пахтакор»ни мағлуб этгани учун эмас, ёш таркибга эга бўлишига қарамай, 10 киши бўлиб мардонавор тўп сургани, бутун мавсумда ҳар қанча қийинчиликларга қарамай, йил давомидаги учинчи финалида ниҳоят ғолиб бўлиб якунда чиройли нуқта қўя олгани учун Рўзиқул Бердиев жамоасини ўрнидан туриб олқишлади.

Фото: Tribuna.uz

Ҳаво совуқлигига қарамай, тақдирлаш маросими ва байрамона концерт ҳамда шоу дастурнинг давом этиши билан минглаб мухлислар қарийб яна бир соат ўйингоҳни тарк этишмади. Финалдан кейин эса қашқадарёлик мухлислар Самарқанд кўчаларида байрамни бошлаган эди.

Қаршидаги тантана

Ўзбекистон кубоги финалида «Пахтакор»ни мағлуб (2:1) этиб, Самарқанддан кубок билан қайтган «Насаф» жамоаси Қаршида тантанали кутиб олинди. Қашқадарё вилояти ҳокими Муроджон Азимов ташаббуси билан «Насаф» клуби кубок билан Қарши шаҳри бўйлаб ҳаракатланди.

Ғалаба муносабати билан «Насаф» стадионида байрам тадбири ҳам ўтказилди. Кубок соҳибини олқишлаш учун ўйингоҳга 2 мингга яқин мухлис ташриф буюрган. Вилоят ҳокими, клуб ҳомийлари, раҳбарияти финалдаги мардонавор ўйин ва соврин учун Рўзиқул Бердиев ҳамда унинг жамоасига чексиз миннатдорчилик билдириб, «Насаф» 2022 йилда ўз олдига юқори мақсадларни қўйиши, клубнинг йиллик бюджети ҳам оширилиши маълум қилинди.

Фото: Tribuna.uz

Бу хабар йил давомида турли қийинчилик ва тўсиқларни муносиб тарзда енгиб ўтган «Насаф» жамоаси ва унинг мухлислари учун яна бир хушхабар бўлди, дейиш мумкин. Ҳар ҳолда ОФК кубоги финалигача етиб борган, миллий жамоаларимизга қатор иқтидорларни етказиб беришдан чарчамаётган Рўзиқул Бердиев жамоаси бунга муносиб эди.

Усмон Ибодов

Top