Armaniston va Ozarboyjon temiryo‘l qurishga kelishib oldi

Armaniston bosh vaziri Nikol Pashinyan va Ozarboyjon prezidenti Ilhom Aliyev Armanistonni Rossiya va Eron, Ozarboyjonni o‘z anklavi - Naxichevan avtonom respublikasi bilan bog‘laydigan temiryo‘l qurishga kelishib oldi.

«Bryusseldagi uchrashuvda Yerasx—Julfa—Ordubad—Megri—Qoradiz temir yo‘lini qurishga kelishib oldik. Armaniston bu temiryo‘l orqali Eron va Rossiyaga, Ozarboyjon Naxichevanga chiqa oladi»,— dedi Pashinyan.

Uning so‘zlariga ko‘ra, agarda Turkiya bilan ham kelisha olinsa, ushbu loyiha yanada kengayadi.

O‘tgan yili Aliyev Ozarboyjon va Turkiya o‘rtasida transport yo‘lagini tashkil etish rejasi haqida gapirgan, mazkur yo‘lak Armaniston orqali o‘tishini aytgandi.

Noyabr oxirlarida Pashinyan va Aliyev Sochida muloqot o‘tkazdi va chegara delimitatsiyasi borasida ikki tomonlama komissiya tuzishga kelishib oldi.