Prezidentning “Oliy sport mahorati instituti faoliyatini tashkil qilish chora-tadbirlari to‘g‘risida”gi qarori loyihasi e’lon qilindi.
Foto: Getty Images
Olimpiya va paralimpiya zaxiralari kollejlarini ikki yillik professional ta’lim tizimini tamomlagan bitiruvchilar uchun uch yillik “spetsialitet” dasturi asosida kadrlar tayyorlaydigan ixtisoslashtirilgan Oliy sport mahorati instituti tashkil qilinmoqda.
Quyidagilar:
a) institutning asosiy vazifalari etib belgilanadi:
- oliy ta’lim sifatiga qo‘yiladigan xalqaro talablarga muvofiq jismoniy tarbiya va sportni rivojlantirish sohasidagi vazifalarni yuqori darajada bajarishga qodir malakali kadrlar tayyorlash;
- ilg‘or xorijiy tajribadan kelib chiqib, sport sohasiga yo‘naltirilgan ilmiy-amaliy tadqiqotlar olib borish va ilmiy ishlanmalarni amaliyotga tatbiq qilish;
- o‘quv va ilmiy loyihalarni amalga oshirish, ta’lim va ilmiy izlanishlar jarayoniga mutaxassislarni keng jalb etish maqsadida ishlab chiqarish va qayta ishlash sohalaridagi respublika va xorijiy yetakchi oliy ta’lim muassasalari hamda ilmiy markazlar bilan hamkorlik aloqalarini rivojlantirish;
- zamonaviy ta’lim texnologiyalariga asoslangan o‘quv jarayonlarini joriy qilish bo‘yicha ilg‘or xorijiy tajribalarni tatbiq etish, jismoniy tarbiya va sport sohasi uchun kadrlar tayyorlash tizimi hamda ochiq axborot-ta’lim muhitini rivojlantirishga ko‘maklashish;
b) institut faoliyatining asosiy yo‘nalishlari etib belgilanadi:
- sport sohasidagi sportchilarni tayyorlashning zamonaviy innovatsion va ilg‘or tajribasini inobatga olgan holda jismoniy tarbiya va sport sohasida yuqori malakali kadrlarni tayyorlash;
- xalqaro toifadagi O‘zbekiston sport ustasi, birinchi, ikkinchi va uchinchi sport razryadli, shuningdek, o‘smirlar uchun birinchi, ikkinchi va uchinchi sport razryadiga ega sportchilarni tayyorlash;
- sport ta’lim jarayonini tashkil etishning zamonaviy usullarini keng joriy qilish, sportchilarni yuqori sport natijalariga erishishlari uchun keng imkoniyatlar yaratish;
- jismoniy tarbiya va sport sohasidagi ta’lim tizimiga yetakchi xorijiy ta’lim muassasalari tajribasini joriy qilish;
- sport menejyerlari va sport marketologlarini tayyorlash;
- ilg‘or xorijiy tajribadan foydalangan holda sport sohasiga yo‘naltirilgan ilmiy-amaliy tadqiqotlar olib borish;
- jismoniy tarbiya va sport sohasida kadrlar tayyorlash tizimini takomillashtirish va modernizatsiya qilishga qaratilgan yangi ta’lim dasturlari hamda o‘quv mashg‘ulotlari innovatsion shakllarini ishlab chiqish va joriy etish;
- istiqbolli bitiruvchi sportchilarni chet el sport muassasalariga va ilmiy-tadqiqot markazlariga o‘qishga yuborish orqali institutning ilmiy-pedagogik salohiyatini oshirish, o‘quv mashg‘ulotlarini tashkil etishning zamonaviy uslublarini faol takomillashtirish;
- ta’lim va ilmiy faoliyatning ishlab chiqarish faoliyati bilan uzviy integratsiyalashuvi uchun shart-sharoitlar yaratish.
Belgilab qo‘yilishicha:
a) institut:
- davlat oliy ta’lim muassasasi – yuridik shaxs shaklidagi O‘zbekiston rezidenti hisoblanadi, alohida mol-mulkka, mustaqil balansga ega, o‘z majburiyatlari bo‘yicha tasarrufidagi pul mablag‘lari va mol-mulk bilan javob beradi;
- respublika olimpiya va paralimpiya zaxiralari kolleji bazasida – Toshkent shahri, Chilonzor tumani, Foziltepa ko‘chasi 38-uy manziliga joylashtiriladi;
- Turizm va sport vazirligining tashkiliy tuzilmasiga kiradi;
- rektori turizm va sport vaziri tavsiyasiga asosan Vazirlar Mahkamasi tomonidan lavozimga tayinlanadi va lavozimidan ozod etiladi;
- bitiruvchilariga O‘zbekistonda oliy ta’lim to‘g‘risidagi hujjat deb e’tirof etiladigan, magistratura darajasiga tenglashtirilgan, belgilangan namunadagi diplom beriladi;
- bitiruvchilarga tanlangan sport turi bo‘yicha “trener”, “hakam”, “seleksioner”, “sport menejyeri” hamda “sport marketologi” mutaxassisliklarini berish amaliyoti yo‘lga qo‘yiladi;
- o‘quv jarayoni 2023/2024 o‘quv yilidan boshlanadi;
- b) ta’limning xalqaro standart tasniflagichining 5-darajasiga mos ta’lim dasturlari olimpiya va paralimpiya kollejlariga 2021/2022 o‘quv yilidan boshlab joriy etiladi.
