Toshkent viloyatidagi mahallada 88 gektar yer bo‘sh yotgani aniqlandi. Zoyir Mirzayev bu yer fuqarolardan olib qo‘yilishini aytdi

“Viloyatda 31 mingta xonadonga tegishli 775 gektar aholi tomorqasidan samarali foydalanilmagan. Hisob-kitoblar viloyat bo‘yicha bitta xonadonga to‘g‘ri keladigan o‘rtacha yer maydoni 5–6 sotixni tashkil etishini ko‘rsatdi. Bu ko‘rsatkich Ohangaron tumanida o‘rtacha 10–12 sotix, Bo‘ka tumanida o‘rtacha 8–10 sotix, Quyi Chirchiq tumanida o‘rtacha 9–11 sotixni tashkil qiladi. Biroq bu maydonlardan samarali foydalanish yo‘lga qo‘yilmagan, tomorqadan daromad olish past darajada. Bitta xonadonga 10–12 sotix yer to‘g‘ri kelishi – katta ko‘rsatkich.

Bir marta Bo‘kada 17 sotixdan 50 sotixgacha tomorqasi bor odamlar bilan o‘zim gaplashdim. Lekin bitta daraxt ekmaganlar bor. Pskentdagi Fayziobod mahallasida yarim gektar tomorqasi bor fuqarolarni ko‘rdim. Mevali daraxt eking desam, yanagi yili kartoshka ekaman deydi. Tomorqa chetiga ikki qator daraxt ekib qo‘yilsa kimga zarar qiladi?

Bitta mahallada fuqarolar tomonidan olib qo‘yilib, lekin hech narsa ekilmagan yoki qurilmagan 88 gektar yer borligi aniqlandi. Endi uni qaytarib olib, auksionga qo‘yib sotamiz. Yoki fermer xo‘jaligi qilib, aholiga 10 sotixgacha taqsimlab bo‘lib beramiz. Mayli, bir vaqtlar shu yerni sotib olganlar ham auksionda qatnashsin, parametrlari to‘g‘ri kelsa yutib olsin, bunga qarshiligimiz yo‘q. Lekin shuncha yer bo‘sh yotishiga ruxsat bermaymiz”, ta’kidladi Zoyir Mirzayev.

Viloyat hokimi o‘z murojaatida aholini qiynayotgan asosiy muammolar – elektr, gaz va ichimlik suv ta’minotidagi kamchiliklarga ham to‘xtaldi.