07:38 / 05.01.2022
50074

Qozog‘iston prezidenti hukumat iste’fosini qabul qildi

Qozog‘iston prezidenti To‘qayev hukumatning iste’fosini qabul qildi, Smoilov bosh vazir vazifasini bajaruvchi bo‘ldi.

Foto: TASS

Qozog‘iston prezidenti Qosim-Jomart To‘qayev respublika hukumatining iste’fosi to‘g‘risidagi farmonni imzoladi, bosh vazirning birinchi o‘rinbosari Alixon Smoilov bosh vazir vazifasini bajaruvchi etib tayinlandi.

«Qozog‘iston Respublikasi hukumatining iste’fosi qabul qilinsin. Qozog‘iston Respublikasi bosh vaziri vazifasini bajarish vaqtincha Smailov Alixon Asxonovich zimmasiga yuklansin», — deyiladi farmon matnida. 

Hujjatda hukumat a’zolariga vazirlar mahkamasining yangi tarkibi tasdiqlanmaguncha o‘z vazifalarini bajarishda davom etish topshirilgan.

2019 yil 25 fevraldan buyon Qozog‘iston hukumatini Asqar Mamin boshqarib kelayotgandi. 

Shuningdek, prezident matbuot xizmatining Twitter’dagi ma’lumotlariga ko‘ra, Qozog‘iston Respublikasi Milliy xavfsizlik qo‘mitasi raisining birinchi o‘rinbosari etib To‘qayev ma’muriyati rahbari o‘rinbosari lavozimida ishlab kelayotgan Murat Nurtleu tayinlangan. 

Avvalroq, Qozog‘iston hukumati aholining suyultirilgan gaz narxi ko‘tarilishiga qarshi noroziliklaridan so‘ng narxni tushirishga rozi bo‘ldi.

Ma’lum qilinishicha, hukumat komissiyasi a’zolari Aqtaudagi namoyishchilar bilan uchrashgan va Mang‘istau oblasti uchun bir litr gaz narxi 50 tenge deb belgilanishini bildirgan.

Mang‘istau oblastida 2 yanvardan beri aholi suyultirilgan gaz narxi oshirilganiga qarshi norozilik mitinglari o‘tkazmoqda. Norozilik namoyishlariga Qozog‘istonning boshqa shaharlari aholisi ham qo‘shilgani aytilmoqda.

Mavzu
Qozog‘istonda gaz namoyishlari
2 yanvar kuni Qozog‘istonning Mang‘istau oblastida suyultirilgan gaz narxi ikki baravarga ko‘tarilganidan norozi bo‘lgan qozog‘istonliklar ommaviy mitingga chiqishdi va keyingi kunlarda namoyishlar butun mamlakat bo‘ylab yoyildi.
Barchasi
Mavzuga oid
Top