Qozogʻiston Harbiy-dengiz kuchlarining sobiq bosh qoʻmondoni Qanat Niyazbekov Kaspiy dengizidagi mashgʻulotlar vaqtida harbiy xizmatchilarning halok boʻlishi ishi yuzasidan hibsga olindi. Prezident Qosim-Joʻmart Toʻqayev oʻtgan haftada uni lavozimidan ozod etgan edi.
Kaspiy dengizining Qozogʻistonga qarashli sektorida 22-sentabr kuni «Kaspiy mudofaasi - 2026» mashgʻulotlari boshlandi. Unga 500 nafardan ortiq harbiy xizmatchi jalb etildi.
24-sentabr kuni harbiy mashgʻulotlar davomida ob-havoning keskin yomonlashishi oqibatida Qozogʻistonning 17 nafar harbiy xizmatchisini dengiz toʻlqinlari oqizib ketdi. Ulardan faqat uch nafarini qutqarib qolishga erishildi.
Qanat Niyazbekov yuz bergan hodisani noqulay ob-havo sharoiti va toʻlqinlarning kuchayishi bilan izohladi. Bunday mashgʻulotlarni oʻtkazishda mazkur omillar inobatga olinganmidi, degan savolga u: «Umuman olganda, inobatga olinadi», - deb javob berdi.
Bu yoʻqotish Qozogʻiston armiyasi tarixidagi eng kattasi boʻldi. Qosim-Joʻmart Toʻqayev barcha aybdorlarni javobgarlikka tortishni talab qildi. Besh nafar mansabdor shaxs allaqachon hibsga olindi, Qozogʻiston Mudofaa vazirligi tekshiruv komissiyasi esa mashgʻulotlarga tayyorgarlik koʻrish va ularni rejalashtirishda kamchilik va qoidabuzarliklarni aniqladi.
