Bedarak yo‘qolgan taksichining jasadi mashina yukxonasidan topildi. Qotillikda koloniyadan qochgan 3 kishi gumonlanmoqda

Bosh prokuratura matbuot kotibi Hayot Shamsutdinov andijonlik taksichi Toshkent viloyatida o‘ldirib ketilgani to‘g‘risida tarqalgan xabar yuzasidan munosabat bildirib, qotillikda gumonlanuvchilar qo‘lga olinganini ma’lum qildi.

8 yanvar kuni Andijon viloyati Shahrixon tumanida yashovchi fuqaro O.Latipova tuman IIBga murojaat qilib, 7 yanvar kuni uydan chiqib ketib, bedarak yo‘qolgan 31 yoshli farzandi M.Otaxonovni topishda amaliy yordam so‘ragan.

Ma’lumotlarga ko‘ra, M.Otaxonov Cobalt avtomashinasida Andijon—Toshkent yo‘nalishida qatnab, aholiga pullik transport xizmati ko‘rsatib kelgan. U 7 yanvar kuni soat 17:55 lar atrofida Shahrixon tumanidagi avtoturargohdan bir fuqarodan 11 650 dollarni Toshkent shahridagi tanishiga olib borib berish uchun olgan hamda notanish bo‘lgan 3 nafar yo‘lovchi bilan birga o‘z avtomashinasida Toshkent shahri yo‘nalishida ketib, bedarak yo‘qolgan.

M.Otaxonov qotillik qurboni bo‘lishi mumkinligi inobatga olinib, Shahrixon tuman prokuraturasi tomonidan 9 yanvar kuni Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan va malakali tergov-tezkor xodimlardan iborat tarkibda tuzilgan tergov guruhi tomonidan tergov harakatlari olib borilgan.

Tezkor qidiruv tadbirlari natijasida M.Otaxonovning murdasi 9 yanvar kuni Toshkent shahar Yashnobod tumanidagi avtoturargohda Cobalt avtotransport vositasining yukxonasidan qotillik alomatlari bilan topilgan.

Jinoyatni fosh etishga qaratilgan tezkor tadbirlar natijasida 3 nafar gumonlanuvchi Qo‘qon shahar hududidan ushlangan va tergovga jalb qilingan. Jinoyat ishi bo‘yicha dastlabki tergov harakatlari Andijon viloyati prokuraturasi tomonidan olib borilmoqda.

Hayot Shamsutdinovning Kun.uz’ga ma’lum qilishicha, ushbu shaxslar Yangi yil arafasida Ohangaronda joylashgan manzil koloniyadan qochib ketgan.

Bundan oldinroq Toshkent viloyatidagi jazoni ijro etish muassasalaridan qochgan uch nafar mahkum shu yil 4 yanvar kuni Namangan-Toshkent yo‘nalishidagi taksi haydovchisining oyoq-qo‘llarini bog‘lab, avtomashina yukxonasiga solib, mashinani Jizzaxga haydab ketishgani haqida xabar berilgandi.