SSV ayiq qafasiga tashlab yuborilgan qizchaning holati haqida ma’lumot berdi

Foto: Sog‘liqni saqlash vazirligi

Sog‘liqni saqlash vazirligi Toshkent hayvonot bog‘ida onasi tomonidan ayiq qafasiga uloqtirilgan qizaloq tibbiyot xodimlari nazoratida ekanini ma’lum qildi.

«Sog‘liqni saqlash vazirligi qizaloqning holati bo‘yicha quyidagilarni ma’lum qiladi:

2018 yilda tug‘ilgan qizaloqqa dastlab hayvonot bog‘i hamshirasi birinchi yordam ko‘rsatadi. Shundan so‘ng tez yordam mashinasida soat 13:30 larda Respublika shoshilinch tibbiy yordam ilmiy markaziga olib kelingan.

Qizcha shifoxonada barcha zarur tibbiy ko‘riklardan zudlik bilan o‘tkazilgan.

U yengil shok holatida bo‘lgan, balandlikdan yiqilish oqibatida ochiq bosh miya jarohati va bosh miya chayqalishi kuzatilgan. Hozirda uning ahvoli yaxshi, tibbiyot xodimlari nazoratida», deyiladi vazirlik xabarida.

28 yanvar kuni Toshkent hayvonot bog‘ida yuz bergan mudhish holat muhokamalarga sabab bo‘ldi. Soat taxminan 12:00 larda yosh ayol noma’lum sabablarga ko‘ra odamlarning ko‘z oldida o‘z qizini ayiq qafasiga tashlab yuborgan.

Ayiq qizaloqqa zarar yetkazmagan. Hayvonot bog‘i xodimlari ayiqni ichki xonaga olib kirishga muvaffaq bo‘lishgan.

Holat yuzasidan Jinoyat kodeksining 25, 97-moddasi 2-qismi “v” bandi (Qasddan odam o‘ldirishga suiqasd qilish) bilan jinoyat ishi qo‘zg‘atilgan. Gumonlanuvchi ayol protsessual tartibda ushlangan.