Qashqadaryoda Toshkentga olib ketilayotgan kelib chiqishi noma’lum bo‘lgan go‘sht to‘xtatib qolindi

Qashqadaryo viloyati Chiroqchi tumanida joylashgan “Umakay” muntazam YPX maskanida Toshkentga olib ketilayotgan 230 kilogramm kelib chiqishi noma’lum bo‘lgan go‘sht to‘xtatib qolingan. Bu haqda viloyat IIB axborot xizmati xabar bermoqda.

Ma’lum qilinishicha, 2022 yil 30 yanvar kuni soat 01:40 larda Qashqadaryo viloyati IIB PPX va JTSB Karantin tadbirlarini ta’minlash guruhi xodimlari YHXB xodimlari bilan hamkorlikda Chiroqchi tumani hududida joylashgan, “Umakay” muntazam YPX maskanida Qashqadaryo-Toshkent yo‘nalishida harakatlanayotgan Cobalt to‘xtatilgan.

Koson tumanida yashovchi, fuqaro H.O‘. boshqaruvida bo‘lgan mashina tegishli tartibda ko‘zdan kechirilganda, uning yukxonasida qoplarga joylashtirilgan, hech qanday veterinariya-sanitariya hujjatlarisiz, sanitariya-gigiyena talablariga zid ravishda, kelib chiqishi noma’lum bo‘lgan taxminan 230 kilogramm go‘sht mahsulotlari borligi aniqlangan.

Qayd etilishicha, mazkur go‘sht mahsulotlari belgilangan tartibda viloyat veterinariya va chorvachilikni rivojlantirish bo‘limi, oziq-ovqat mahsulotlari xavfsizligi mikrobiologiya va veterinariya-sanitariya ekspertiza laboratoriyasiga topshirilgan.