“Olarda kirar jonim...” Jomboy soliq idorasi toshkentlik tadbirkorni 1,5 mlrd so‘mga “kiydirmoqda”  

Kun.uz’ga Jomboy tumanida faoliyat yuritgan tadbirkor sud qarori bo‘lishiga qaramay, soliqchilar ortiqcha undirgan 1,5 milliard so‘m pulini ololmayotgani haqida gapirib berdi. Tadbirkor Azizxon Nuriddinov taqdim etgan hujjatlarga ko‘ra, soliqchilar uni 3 yildan beri qiynab keladi.

Tadbirkor oxirgi 1 oy ichida ikki marta Samarqand viloyat hokimi Erkinjon Turdimov qabulida bo‘lgan. Eng so‘nggi qabulda viloyat hokimi masalani o‘rganib chiqib, tegishli xulosa qilishni viloyat adliya boshqarmasi boshlig‘iga topshiradi. Tadbirkorning so‘zlariga ko‘ra, Turdimov qabulidagi soliq idorasi vakillari va murojaatchilarga qarata “Adliya qanday xulosa qilsa – o‘sha bo‘ladi” deydi. Oradan ko‘p o‘tmay, Adliya boshqarmasi o‘zi xulosasini viloyat hokimiga taqdim etadi.

Aniqlanishicha, O‘zbekiston Respublikasi Bosh prokuraturasi O‘ta og‘ir jinoyatlarni tergov qilish boshqarmasi tergovchisining A.Yuldashev, A.Nuritdinov va boshqalarga nisbatan qo‘zg‘atilgan 17/18-31-sonli jinoyat ishi bo‘yicha 2018 yil 14 iyundagi qarori bilan “Next Farm” va “Nf Next Farm Business” MChJlar faoliyati yuzasidan hujjatli taftish tayinlangan.

O‘tkazilgan hujjatli taftish natijasida, “Next Farm” MChJga nisbatan

8 mlrd 283 mln so‘m, “Nf Next Farm Business” MChJga nisbatan 778,5 mln so‘m, jami 9 mlrd 62 mln so‘m soliq va boshqa majburiy to‘lovlar hisoblangan.

Tekshirish natijasi yuzasidan Jomboy tuman davlat soliq inspeksiyasining 2018 yil 12 sentyabrdagi da’vo arizalariga asosan Jomboy tuman iqtisodiy sudining 2018 yil 10 oktyabrdagi hal qiluv qarori bilan “Next Farm” MChJga nisbatan 19 648,4 mln so‘m miqdorda moliyaviy jarima qo‘llanilgan.

Jomboy tuman davlat soliq inspeksiyasi tomonidan “Next Farm” MChJni soddalashtirilgan tartibda bankrot deb topish haqida da’vo ariza kiritilgan. Jomboy tumanlararo iqtisodiy sudining 2020 yil 23 iyundagi tugatishga doir ish yuritish taomilini tamomlash to‘g‘risidagi ajrimiga asosan “Next Farm” MChJni tugatishga doir ish yuritish taomili tamomlanib, mazkur jamiyat davlat reyestridan chiqarilgan.

“Next Farm” MChJ bankrot deb topilganligi sababli Jomboy tuman davlat soliq inspeksiyasining 2020 yil 26 iyundagi 12-sonli qarori bilan jamiyatning 25 mlrd 288 mln so‘m soliq qarzi va moliyaviy jarima hisobdan chiqarilgan.

Jinoyat ishlari bo‘yicha Toshkent shahar Uchtepa tuman sudining 2018 yil 25 dekabrdagi hukmi bilan A.Nuritdinov Jinoyat kodeksining 28,179-moddasi, 28,184-moddasi uchinchi qismi, 28,189-moddasi birinchi qismi, 28,190-moddasi ikkinchi qismining “a”, “b”, “v” bandlari, 228-moddasi ikkinchi qismining “a”, “b” bandlari bilan aybli deb topilib, tegishli jazo tayinlangan.

Mazkur hukm bilan dastlabki tergovda taftish natijasida aniqlangan jami 9 mlrd 62 mln so‘m soliq va boshqa majburiy to‘lovlardan qarzdorlik dastlabki tergovda va sud jarayonida jamiyatlarga tegishli xatlangan mol-mulklar hisobidan soliq va majburiy to‘lovlarning 3 mlrd 909 mln so‘m qismi (JIB Toshkent shahar sudi kassatsiya instansiyasining 2021 yil 21 yanvardagi ajrimi bilan mazkur sudning 2020 yil 24 dekabrdagi hukmga tushuntirish berilib, soliq va majburiy to‘lovlarning 4 mlrd 89 mln so‘m) qoplangan.

Jinoyat ishlari bo‘yicha Toshkent shahar sudi kassatsiya instansiyasining 2019 yil 8 oktyabr va 2020 yil 24 dekabrdagi ajrimi bilan “Next Farm” va “Nf Next Farm Business” MChJlarga nisbatan qo‘shimcha hisoblangan soliq va boshqa majburiy to‘lovlar jami 9 mlrd 62 mln so‘m o‘rniga ekspertiza xulosasiga asosan 2 mlrd 577 mln so‘m deb topilib, ortiqcha undirilgan (3 mlrd 909 mln so‘mga nisbatan) 1 mlrd 332 mln so‘m – sud ajrim bilan tuzatishiga asosan 4 mlrd 89 mln so‘mga nisbatan 1 mlrd 512 mln so‘m sudlanuvchi A.Nuritdinov (hukmga tuzatish kiritilib A.Yuldashev)ga qaytarish belgilangan hamda fuqarolar A.Nuritdinov, A.Yuldashev va A.Ortiqovdan solidar tartibda davlat foydasiga undirish belgilangan jami 5 mlrd 152 mln so‘m soliq qarzdorlik qismi bekor qilingan.

O‘zbekiston Respublikasi Oliy sudi jinoyat ishlari bo‘yicha sudlov hay’atining 2021 yil 27 avgustdagi ajrimi bilan Jinoyat ishlari bo‘yicha Toshkent shahar sudi kassatsiya instansiyasining 2020 yil 24 dekabrdagi ajrimi o‘zgarishsiz qoldirilgan.

“Sudlar to‘g‘risida”gi O‘zbekiston Respublikasi Qonuniga asosan qonuniy kuchga kirgan sud hujjatlari barcha davlat organlari, jamoat birlashmalari, korxonalar, muassasalar va tashkilotlar, mansabdor shaxslar, fuqarolar uchun majburiydir hamda O‘zbekiston Respublikasining butun hududida ijro etilishi shartligi belgilangan.

Sud hujjatlarini ijro etish O‘zbekiston Respublikasi Bosh prokuraturasi huzuridagi Majburiy ijro byurosining davlat ijrochilari zimmasiga yuklatilgan.

Toshkent shahar sudi kassatsiya instansiyasining 2020 yil 24 dekabrdagi ajrimi bilan fuqaro A.Yuldashevga qaytarish belgilangan 1.512.661.999 so‘m mablag‘lar Jomboy tuman davlat soliq inspeksiyasi tomonidan Majburiy ijro byurosi Jomboy tuman bo‘limi orqali qaytarib berilishi lozim, deyiladi Adliya boshqarmasi xulosasida.

Ammo, lekin, biroq...

Mazkur xulosa shu yil 1 fevral kuni Turdimovga taqdim etildi. Turdimov va’dasiga muvofiq xulosani 1 hafta ichida (7 fevralga qadar) ijrosini ta’minlab qo‘yish kerakligi uqtirilgan “fishka” bilan Samarqand viloyat Soliq boshqarmasi boshlig‘i A.Inagamovga yuboradi.

Erkinjon Turdimovning “fishka”si soliqqa yuborilganiga ham yaqinda 1 oy to‘ladi. Samarqandning soliqchilariga esa qonunlar, sud qarorlari, adliyani xulosalari-yu viloyat hokimining topshirig‘i bir tiyin ekani yana bir bor tasdig‘ini topmoqda.

Temur Tursunboyev Kun.uz muxbiri