Qashqadaryoda ov qilish taqiqlangan pnevmatik miltiq bilan ov qilib yurgan shaxs ushlandi

Qashqadaryo viloyati Ekologiya va atrof-muhitni muhofaza qilish boshqarmasining xabar berishicha, Kitob tuman ekologiya bo‘limi inspektorlari tomonidan hududda ov qilish qoidalarini tushuntirish maqsadida ekologik nazorat reyd tadbiri o‘tkazilgan.

Reyd davomida “Palandara” MFY hududida yashovchi fuqaro T. Z. ov qilish uchun taqiqlangan, havaskorlik sport quroli bo‘lgan pnevmatik miltiq bilan hududdagi Qoraxon tog‘idan ov qilib qaytayotganda to‘xtatilib, mashinasi ko‘zdan kechirilganda uning salon qismidan 1 dona pnevmatik miltiq, 1 dona audiopleyr, yukxonasida 1 dona kaklik borligi ma’lum bo‘lgan.

Inspektorlar tomonidan ushbu fuqaroning ov qilish huquqini beruvchi hujjatlari tekshirilganda hech qanday hujjatlar yo‘qligi aniqlangan. Pnevmatik miltiq tuman IIBga hujjatlar to‘planib, sud qarori chiqquniga qadar ushlab turish uchun topshirilgan.