Coca-Cola Rossiyadagi biznesini to‘xtatganini e’lon qildi, «Makdonalds» barcha restoranlarini yopadi

Coca-Cola kompaniyasi Ukrainadagi voqealar fonida Rossiyadagi faoliyatini to‘xtatayotganini e’lon qildi.

Kompaniyaning press-relizida hech qanday tafsilotlar yo‘q. Faqat Coca-Cola kompaniyasiga tegishli zavodlar yopiladimi yoki kompaniya Rossiyada ichimliklar sotishni rasman to‘xtatadimi, hozircha aniq emas. 

Coca-Cola ichimliklari rasmiy ravishda Shimoliy Koreya va Kubadan tashqari dunyoning barcha mamlakatlarida sotiladi. 
 
PepsiCo ham Rossiyadagi faoliyatini to‘xtatganini e’lon qildi. Kompaniya o‘zining gazlangan ichimliklarini Rossiyada sotishni to‘xtatmoqda, ammo sut, chaqaloqlar va bolalar ovqatlari kabi zarur mahsulotlarni sotishda davom etadi. 

O‘z navbatida, «Makdonalds» Rossiyadagi barcha 850 ta restoranini yopadi. Bu haqda kompaniya bayonotiga asoslanib, Bloomberg xabar bermoqda. 

Shu bilan birga, «Makdonalds» hozircha «brend rivojlanishiga o‘z qalbi va yuragini baxshida qilgan» 62 ming rossiyalik xodimga maosh to‘lashda davom etishini ta’kidladi. 

Avvalroq, 8 mart kuni KFC brendining egasi Yum! Brands kompaniyasi Rossiyada rivojlanish dasturlarini to‘xtatayotganini e’lon qildi. Restoranlar yopilishi haqida hech qanday xabar yo‘q.

Burger King bundan oldin Rossiyada ishlashda davom etishini ma’lum qilgan edi.