Самарқанд давлат университети иккинчи босқичида таҳсил олаётган талаба қиз олийгоҳ ётоқхонасининг 9-қаватидан ўзини ташлаб, ҳалок бўлган. Қиз ётоқхонанинг 6-қаватида яшаган.
Фото: KUN.UZ
Ҳолат 29 март куни тунги соат 02:00 ларда Спитамен шоҳкўчасидаги талабалар ётоқхонасида содир бўлган. Талаба университетнинг кечки таълим йўналишида таҳсил олгани айтилмоқда.
Университетнинг ёшлар масалалари бўйича проректори Шаҳзода Негматова талаба қизнинг хулқ-атвори, ўқишга бўлган муносабати ҳақида маълумот берар экан, унинг ҳеч ким билан зиддиятга бормагани, бироқ ўзи журъатсизроқ бўлганини айтган.
Ҳалок бўлган талаба қиз Паст Дарғом туманидан бўлиб, ётоқхонанинг 6-қаватида яшаб келган ва ўзини 9-қаватдан ташлаган.
Самарқанд вилоят прокуратураси берган маълумотга кўра, талаба оғир тан жароҳати олиши оқибатида воқеа жойида ҳалок бўлган. Ҳолат юзасидан Самарқанд шаҳар прокуратураси терговга қадар текширув ҳаракатларини олиб бормоқда.
