Rossiya 2022 yilda neft va gazdan 321 mlrd dollar daromad olishi mumkin - Bloomberg

Rossiya 2022 yil yakuni bo‘yicha neft va gaz eksportidan 321 mlrd dollar atrofida daromad olishi mumkin, bu 2021 yildagiga nisbatan o‘ttiz foizga ko‘p. Bloomberg Economics ekspertlari ana shunday fikr bildirdi.

Vashington xalqaro moliya instituti (IIF) xodimlari ham shunga o‘xshash xulosaga kelishdi.

«Hozirgi sanksiyalar saqlanib qolgan holatda Rossiyaga qattiq valuta kelishi davom etadi», — deyiladi institut hisobotida.

TS Lombard tahlilchilari rublning keskin devalvatsiyasi va narxlar oshishi uyg‘unligida neft Rossiya budjetiga qo‘shimcha 8,5 trln rubl (103 mlrd dollar) keltirishini taxmin qilmoqda.

Rossiyaning neft va gazdan daromadi ko‘payishi bilan bog‘liq vaziyatni faqat yirik importyorlar tomonidan Rossiyaga energetik embargo kiritilishigina o‘zgartirishi mumkin, deya qayd etgan Bloomberg.

«Uglevodorodlar sotuvidan keladigan daromad Rossiya iqtisodiyoti uchun qutqaruv chambaragi hisoblanadi. Ammo energetik embargosiz ham inflatsiya o‘smoqda va chuqur retsessiya yaqinlashmoqda», — deya fikr bildiradi Bloomberg Economics eksperti Skott Jonson. 

TS Lombard eksperti Madina Xrustalevaning fikricha, sanksiyalar Rossiya iqtisodiyotining «noenergetik qismi»ni izdan chiqaradi, natijada «Rossiya energiya resurslariga yanada bog‘lanib qoladi».