O‘zbekistonda yoshlar gender tenglik sohasi bo‘yicha faoliyat yuritadigan jamoa tuzildi

Senat matbuot xizmatining Kun.uz’ga xabar berishicha, 14-21 aprel kunlari bu jamoaga yoshlarni saralab olish bo‘yicha kasting o‘tkazilgan. Unda Qoraqalpog‘iston Respublikasi, viloyatlar va Toshkent shahrining faol yoshlari onlayn hamda oflayn tarzda ishtirok etib, gender tenglik sohasi bo‘yicha aniq bilim va ko‘nikmaga ega bo‘lgan mingga yaqin mustaqil fikrlovchi yoshlar orasidan 80 nafar yigit-qiz “Gender adolat yetakchisi” jamoasiga saralab olingan.

2030 yilga qadar qabul qilingan Gender Strategiyasida aks etgan 8 ta yo‘nalish bo‘yicha faol yoshlardan 8 ta guruh shakllantirildi. Strategiya ijrosini ta’minlashda gender adolat yetakchilari faol ishtirok etishlari ham nazarda tutilgan.

Yaqinda Senat binosida “Gender adolat yetakchisi" jamoasiga saralab olingan yoshlar bilan uchrashuv tashkil etildi.

Xotin-qizlar va erkaklar uchun teng huquq hamda imkoniyatlarga erishish bugungi kunning dolzarb masalalaridan biri. Gender adolat yetakchisi platformasini ishga tushirishdan ko‘zlangan maqsad gender tenglikni ta’minlash, xotin-qizlarni qo‘llab-quvvatlashga qaratilgan islohotlarni hamda yoshlar hayotidagi o‘zgarish va yangilanishlarni keng targ‘ib etish, sohaga doir davlat dasturlari ijrosiga ko‘maklashish, yoshlarning huquqiy ongini o‘stirish orqali xotin-qizlarga nisbatan kamsitishlarning har qanday shakliga barham berishdan iborat”, deydi Senatning Oila va xotin-qizlarni qo‘llab-quvvatlash hamda gender tenglik masalalari bo‘limi mudiri Nodira Shotursunova.

Uchrashuvda jamoa vakillari ko‘plab fikr va mulohazalarini bildirib o‘tdilar. Ushbu yangi tuzilma a’zolarining gender tenglik targ‘ibotidagi faoliyatini tashkil etish va ularga amaliy yordam ko‘rsatish Senatning doimiy nazoratida ekanligi ta’kidlandi.