Ikki viloyatda fermer xo‘jaligi yerini sotib yubormoqchi bo‘lgan shaxslar ushlandi

Bosh prokuratura huzuridagi departamentning Toshkent shahar Mirzo Ulug‘bek tuman bo‘limi tomonidan Transport prokuraturasi hamda IIV xodimlari hamkorlikda tezkor tadbir o‘tkazilgan.

Unda, fuqaro Z.Yu. Toshkent viloyati Piskent tumanidagi “B.” bog‘dorchilik uzumchilik shirkatiga qarashli bo‘lgan, 6 nafar fuqaroga uzumchilik yo‘nalishida ajratilgan jami 1,1 gektar yer maydonini boshqa bir fuqaro M.ga 30 000 AQSh dollariga sotishga kelishib, oldindan 20 000 AQSh dollarini olgan vaqtida ashyoviy dalillar bilan ushlangan.

Shu kabi, departament hamda Davlat xavfsizlik xizmatining Jizzax viloyati boshqarmalari tomonidan tezkor tadbir o‘tkazilgan.

Unda, Sharof Rashidov tumanidagi “X.A.” fermer xo‘jaligi rahbari A.R. ushbu xo‘jalikning 68,8 gektar suvli yer maydonining 5 gektarini fuqaro M.ga tanishlari orqali rasmiylashtirib berish evaziga 200 mln so‘mni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) va 28, 211-moddasi (pora berish) bilan jinoyat ishlari qo‘zg‘atildi.

Departament xabariga ko‘ra, hozirgi vaqtda tergov harakatlari o‘tkazilmoqda.