«Tonirovka»ga berilgan ruxsatnoma mashinaga egalik huquqi o‘zgarganda avtomatik tarzda saqlab qolinadi

Avtotransport vositalari oynalari tusini o‘zgartirishga (qoraytirishga) ruxsatnoma berish Yagona interaktiv davlat xizmatlari portali bilan bir qatorda ichki ishlar organlari yo‘l harakati xavfsizligi bo‘linmalari tomonidan ham amalga oshirish tartibi joriy etiladi.

Ichki ishlar vazirligi manfaatdor vazirlik va idoralar bilan birgalikda 2022 yil 1 sentabrga qadar oynalari tusini o‘zgartirishga (qoraytirishga) ruxsat berilgan avtotransport vositasiga bo‘lgan egalik huquqi o‘zgarganda, davlat raqami belgisi almashtirilganda yoki avtotransport vositasi egasi ma’lumotlarida o‘zgarish bo‘lganda avtotransport vositalari oynalari tusini o‘zgartirishga (qoraytirishga) berilgan ruxsatnoma amal qilish muddatini avtomatik tarzda saqlab qolish tartibini joriy etadi.

2022 yil 1 sentabrdan boshlab ishlab chiqarilganiga o‘n yilgacha bo‘lgan jismoniy shaxslarga tegishli yengil avtomototransport vositalarini texnik ko‘rikdan o‘tkazish ixtiyoriy ravishda amalga oshiriladi.

Yengil avtomototransport vositalarini majburiy texnik ko‘rikdan o‘tkazish quyidagi muddatlari belgilanadi:

• ishlab chiqarilganiga 11 yildan 14 yilgacha bo‘lgan yengil avtomototransport vositalari – ikki yilda bir marta;
• ishlab chiqarilganiga 15 yil va undan ortiq bo‘lgan yengil avtomototransport vositalari – bir yilda bir marta.