«Hayotimni qo‘yganman bu masalaga» - prezident deputatlar va mahalliy rahbarlardan qoraqalpoq elini asrashni so‘radi

Prezident Shavkat Mirziyoyev Qoraqalpog‘iston Respublikasi Jo‘qorg‘i Kengesi deputatlari, Vazirlar Kengashi rahbarlari va jamoatchilik vakillari bilan uchrashuv o‘tkazdi.

Uchrashuvda davlat rahbari separatizmga, ommaviy tartibsizliklarga da’vat etadigan har qanday harakatlarga qonunchilikka muvofiq keskin chora ko‘rilishi, aybdorlar jazoga tortilishini aytib o‘tdi.

«Men har safar g‘urur bilan aytaman, men ham O‘zbekiston, ham Qoraqalpog‘iston farzandiman deb. Yuragimdan aytaman buni doim. Hayotimni qo‘yganman bu masalaga. Bir so‘m topsam, 60 tiyinini oldin Qoraqalpog‘istonga beryapman. Qoraqalpoq elim, yoshlarimga.

Har bittalaringni eshitmoqchiman. Bu qadrdon vatanimizni, shuncha qilgan mehnatimizni o‘zimiz saqlamasak, boshqa hech kim saqlab bermaydi. Sizlardan iltimosim shuki, bu dargohni, qoraqalpoq elini asrashlaring kerak. Bu yerda yashashlaring kerak, odamlarga tushuntirishlaring kerak hamma narsani. Yoshlarni yo‘lga solish kerak.

Shuning hammasini joy joyiga qo‘yish uchun keldim. Meni bugun Qoraqalpog‘istonga ko‘nglim olib keldi, mehrim olib keldi, yuragim olib keldi. Men qanday tinch o‘tira olaman?

Men baribir, qanday og‘ir bo‘lmasin, qonun ustuvorligini, jazo muqarrarligini ta’minlayman. Shuni hamma bilishi kerak. Menga tinchlik kerak. Bir narsani bilinglar - davlatning kuchiyam bor, qudratiyam bor, imkoniyatiyam bor», degan prezident.