Bugun, 5 iyul kuni «PSJ» klubi tomonidan o‘tkazilgan matbuot anjumanida jamoaning yangi bosh murabbiyi tanishtirildi.
Parij klubini yangi mavsumdan boshlab Kristof Galte boshqaradigan bo‘ldi. Parijliklar yangi bosh murabbiyni «Park de Prens» stadionida tanishtirishdi. Fransiyalik 55 yoshli mutaxassis bilan 2 yillik shartnoma imzolandi.
«Jamoamizning yangi bosh murabbiyi Kristof Galteni sizga tanishtirishdan mamnunman. Bugundan yangi maqsad hamda vazifalar bilan jamoamizda yangi era boshlanmoqda. Biz bu murabbiyning «Sent-Eten», «Lill» va «Nitssa»dagi faoliyatini kuzatib, jamoamizga taklif etdik. Fransuz mutaxassisining klub loyihasiga qo‘shilganidan juda ham xursandmiz», - dedi «PSJ» prezidenti Nossir Al-Hilayfiy taqdimot marosimida.
Ma’lumot uchun, Parij klubi 4 o‘yindan beri Galte jamoalariga («Nitssa», avvalgisi «Lill») gol ura olmayapti.
Avvalroq, parijliklar Maurisio Pochettinoni iste’foga chiqargandi. Argentinalik mutaxassis bir yarim yil davomida klubda faoliyat yuritdi.