Ronaldu intrigani boshladi. U nimani ko‘zlayapti?

Bu xabar shunchaki navbatdagi mish-mish sifatida qolishi uchun futbolchi joriy hafta boshidan Karringtonga kelishi va jamoa mashg‘ulotlarida qatnashishni boshlashi kifoya edi. Ammo Ronalduning «oilaviy sabablar» tufayli Portugaliyada qolayotgani va ikkinchi kundirki, mashg‘ulotlarga qo‘shilmayotgani vaziyat tamomila jiddiy ekanini ko‘rsatmoqda.

Iyun oyi oxirida ham Ronaldu o‘zini «Bavariya»ga taklif qilib ko‘rgani, uning agenti Mendesh «Chelsi» va «Barselona» rahbarlari bilan uchrashuvlar o‘tkazayotgani haqida xabarlar tarqalgandi.

Xo‘sh, Ronaldu nega ketmoqchi?

Angliyaning mashhur The Athletic nashri ham ushbu masala yuzasidan shu kungacha chiqqan ishonchli ma’lumotlar asosida vaziyatni tahlil qilishga urinib ko‘rdi. Xo‘sh, Ronaldu nega ketmoqchi?

Hammasi tushunarli. Shubhasiz, Ronaldu «Manchester Yunayted»ni yaxshi ko‘radi, klub bilan bog‘liq yorqin xotiralarga ega. Ammo agar ikkinchi yil ham jamoada qoladigan bo‘lsa, Chempionlar Ligasida to‘p sura olmaydi. Agar u qolsa o‘z faoliyatida ilk bor YeChLda o‘ynamasligiga to‘g‘ri keladi. Krishtianu shu paytgacha 5 marta ushbu turnirda g‘olib chiqqan va bu borada Yevropadagi eng yaxshi ko‘rsatkichga ega edi. Ammo «Real»dagi bir qator sobiq jamoadoshlari ham beshinchi marta sovrindor bo‘lgach, tabiiyki, 37 yoshli futbolchi yana bir bor ushbu kubokni boshi uzra ko‘tarishni, hech bo‘lmasa, kurashishni istaydi.

Yaqin yillarda o‘z faoliyatini yakunlaydigan Ronaldu imkon qadar ko‘proq sovrinlarni yutishni istaydi, «Yunayted» esa, o‘tgan mavsumda biror turnirda g‘alaba uchun jiddiy kurash olib bora olmadi. Erik ten Hagning Manchesterga kelishi futbolchida ijobiy kayfiyat va ishonch uyg‘otgani shubhasiz, ammo klub transfer bozorida faol emasligi va bir qator maqsadlar hali ham rasman hal etilmagani uning fikrini o‘zgartirib yuborgani aytilmoqda.

«Manchester Siti» Holand bilan, «Liverpul» esa Nunez bilan rasman shartnoma qilib ulgurdi. «Tottenhem» bu yoz o‘ta faol va Kontening barcha istaklari bajo keltirilmoqda. Shusiz ham raqobatchilardan ancha ortda poygani boshlaydigan «Manchester Yunayted» bir qator top-futbolchilarga muhtoj ekanini Ronaldu aytib kelmoqda. Klub Frenki de Yong borasida bir oydan beri siljishga erisha olmayapti. APLdagi raqiblar yanada kuchayayotgan, Chempionlar Ligasi esa, kamida bir yilga kechikkan palla o‘zini dunyoning eng yaxshi futbolchisi deb hisoblaydigan Ronaldu uchun jozibador ko‘rinmayapti.

Klub Ronalduni sotishni istaydimi?

Yo‘q. «Yunayted»ning Ronaldu bo‘yicha qarori – u sotilmaydi. Shartnoma bo‘yicha yana bir yil o‘ynashi kerak. Yangi murabbiy Erik ten Hag Ronaldu bilan ishlash niyatida ekanini aytgan va o‘z navbatida Ronalduning o‘zi ham niderlandiyalik murabbiy haqida iliq fikrlar bildirgan.

«Men Erikning «Ayaks»da fantastik natijalar qayd etganini bilaman. U tajribali mutaxassis va unga yetarli vaqt berish lozim. Shundagina, hammasi u aytganidek, yaxshi tomonga o‘zgaradi», – degandi o‘z intervyularidan birida portugaliyalik hujumchi.

Shuningdek, Ronalduni sotish fikri klub uchun yangilik emasligi va balki aynan shu g‘oya tarafdorlari bo‘lishi mumkinligini ham ta’kidlash kerak. Birinchidan, ma’lum bo‘lishicha, Ralf Rangnik qishdayoq Ronalduni sotib, o‘rniga yoshroq hujumchi olish kerakligini bir necha marta so‘ragan, ammo bu istak e’tiborsiz qoldirilgan. Ikkinchidan, Erik ten Hagning kelishi, uning uslubi Ronalduga mos kelmasligi mumkinligi ham ko‘p aytilgandi, hatto niderlandiyalik mutaxassis ilk intervyularida Ronaldu bilan ishlashdan xursandligini aytganida, ko‘pchilik hayron ham qolgandi.

Yangi qurilayotgan jamoada Ronalduning borligi bir tomondan, albatta, foydali, lekin agar hammasi kutilmagandek ketsa, o‘z egosini doim yuqori qo‘yib kelgan yulduzni boshqarish yanada qiyinlashib ketishi mumkinligini ham inobatga olish lozim. Bundan tashqari, APLda eng katta maosh oladigan futbolchining ketishi moliyaviy tomondan ham klubga foydali bo‘ladi.

Tabiiyki, bu yo‘nalishdagi fikrlar ham klub ichkarisida muhokama qilingan, ammo muxlislar bilan so‘nggi yillardagi ziddiyatlar, Erik ten Hagning xohishi tufayli, Ronalduni sotish g‘oyasi hech qachon klub tomonidan yangramaydi. Mabodo yakunda Krishtianu o‘ziga boshqa klub topadigan bo‘lsa-da, bu transferdan klub oppoq bo‘lib chiqib, barcha «ayb» futbolchiga to‘nkalishi tabiiy.

Ronalduning hozirgi harakatlari Fergyusonning «futbolchi klubdan katta bo‘lmasligi kerak» degan an’anasiga zid ekanini aytayotganlar bor. Ammo vaziyatni chuqur bilmasdan turib, bunday katta gaplardan tiyilish kerak. Ronaldu o‘z noroziligini qay tariqa ma’lum qilayotgani va klub-futbolchi munozaralarini to‘liq bilmaymiz.

Yodingizda bo‘lsa, 2011 yilda Ueyn Runi ham klub top-futbolchilar olib kelmayotganini aytib, yangi shartnomani rad etgan va «Chelsi»ga o‘tib ketishni istagandi. O‘shanda Aleks Fergyuson Ueynni tushungan va yakunda futbolchi bilan gaplashib, jamoada qolishga ko‘ndirgan, keyin Robin van Persi va Shinji Kagava kabi futbolchilar transfer qilingandi.

Ronalduni sotib olishni istashadimi?

Qisman, ha. To‘g‘ri, Ronaldu o‘zining eng yaxshi yillariga nisbatan pasaygan, ammo jarima maydonida harakat qilishda hozir ham o‘ta xavfli ijrochi. O‘tgan mavsumda u «Yunayted»ning eng yaxshi to‘purari bo‘ldi, 37 yoshida 38 o‘yinda qatnashib, 24 golga mualliflik qildi. Umuman, o‘tgan mavsumda APLda faqat Saloh va Son undan ko‘proq gol ura oldi.

Shu bilan birga, Ronalduning hali ham jarohatlar chetlab o‘tayotganini ta’kidlash kerak. Transfermarkt ma’lumotiga ko‘ra, futbolchi oxirgi ikki mavsumda turli kichik jarohatlar tufayli atigi 19 kunni o‘tkazib yubordi, xolos. 

Ronalduga qaysi klublar qiziqmoqda?

O‘tgan oyda «Chelsi»ning yangi xo‘jayini Todd Bouli Jorjye Mendesh bilan uchrashgandi. Tomonlar o‘rtasidagi munozaralarda Ronalduning «Chelsi»ga o‘tishi mumkinligi ham tilga olingan. Romelu Lukakuni «Inter»ga bir yillik ijara uchun qaytarib yuborgan «Chelsi» ushbu imkoniyatdan foydalanadimi, yo‘qmi, bunisi noma’lum.

Yetakchi hujumchisi Robert Levandovskini saqlab qolishga urinayotgan, ammo yakunda «Barselona»ga sotishga majbur bo‘lib qolishi mumkin bo‘lgan «Bavariya», aynan Levandovskini qo‘lga kirita olmagach, top-hujumchiga ehtiyoj sezishi mumkin bo‘lgan «Barselona», shuningdek, Italiyaning «Napoli» klublari turli variantlar sifatida tilga olinmoqda.

Ronalduning «Yunayted»ga qaytishi oldidan «Manchester Siti» bilan muzokara olib borgan Mendesh, ayni o‘sha fokusni Barselona orqali ham amalga oshirayotgan bo‘lishi mumkin. Ya’ni futbolchi va uning agenti «Real»ga qaytishga qarshi emas. Ammo o‘z navbatida «Qirollik klubi» Ronalduning kelishidan manfaatdor bo‘lmasa kerak. Zero, ba’zi xabarlarga ko‘ra, madridliklar Krishning Vinisius, Rodrigo va Benzema kabi futbolchilarga salbiy ta’sir ko‘rsatishi mumkinligidan xavotir olishgan.

Maurisio Pochettinoni iste’foga chiqargan «PSJ» ham yangi da’vogar sifatida paydo bo‘lishi ehtimoli bor. Bu transfer haqiqatdan yiroq tuyulayotgan bo‘lsa-da, tasavvur qiling, Qatardagi jahon chempionati oldidan Ronaldu va Messi juftligini maydonda namoyish qilish aynan «PSJ»ning chekiga tushsa? Har qanday holatda Fransiya chempionatida baribir g‘olib bo‘ladigan klub bugungacha Angliya, Italiya va Ispaniyada chempion bo‘lib ulgurgan Ronaldu uchun ayni muddao.

Ronalduning ketishi «MYu»da muammo tug‘diradimi?

Albatta. The Athletic muxbiri Lori Uitvell aytganidek, Erik ten Hag o‘z jamoasida Ronaldu bo‘lishiga tayyorlangan va o‘z taqdimotida buni markaziy omil sifatida olgan. Ronaldu ketadigan bo‘lsa, shundog‘am yangi transferlarni amalga oshirmayotgan «Manchester Yunayted»da tushunmovchilik yuzaga keladi.

Uitvellning aytishicha, «hujumkor futbolchilar ten Xagning transfer ro‘yxatida keyingi o‘rinlarda bo‘lgan va agar Ronaldu ketadigan bo‘lsa, ichki imkoniyatlarni qidirishga to‘g‘ri keladi. Uning ketishi balki Reshford va Sanchoning o‘sishida ijobiy ta’sirini ko‘rsatar, ammo shunday bo‘lsa-da, asosiy rejalari bo‘lgan Holand va Nunezni qo‘ldan chiqargan «Yunayted»ning yaqqol hujumchisiz qolishi o‘ziga yarasha muammo tug‘dirishi mumkin».

Boshqa tarafdan qaralsa, ten Hag so‘nggi mavsumda «Ayaks»da Aller kabi yaqqol hujumchi bilan o‘ynagan bo‘lsa-da, ko‘proq oldingi chiziqda faol universallar bilan ham muvaffaqiyat qozona oladi. Bu rolga tarkibda Reshford, Sancho, Marsiyal va Elanga bor. Ronalduning ketishi klubga taxminan 40 million yevro iqtisod qilishini (bir yillik maosh + transfer narxi) e’tiborga olsak, ten Hag o‘zi orzu qilayotgan Antonini ham «Ayaks»dan olib kelishi mumkin.

(2019 yilda YeChL yarimfinaliga chiqqan «Ayaks»ni eslasak, jamoa katta o‘yinlarda aldamchi to‘qqizlik sifatida Tadich bilan harakat qilgan – to‘g‘ri, yaqqol tayanch vakili Strotman bor edi, lekin «MYu» hozir Martines uchun ham kurashayotganini e’tiborga olsak, u aslida tayanch yarimhimoyachisi hisoblanadi va ten Hag markaziy himoyachiga ehtiyoj borligi uchun uni himoyaga o‘tkazgan).

Ba’zida Portugaliya terma jamoasida, hatto «MYu»da ham bu rolda sinab ko‘rilgan Bruno Fernandeshni unutmaslik kerak. Kristian Eriksen va de Yong markazga keladigan bo‘lsa, Brunoni biz o‘sha Tadichning rolida ko‘rishimiz ham mumkin.

Oldingi chiziqda Bruno, Antoni, Sancho, Reshford, Marsiyal, markazda Eriksen, de Yong, Van de Bek, Maktominey, Fred, Martines... Deyarli ten Hag uchun jamoa.

Nazarimda, Ronalduning ketishi niderlandiyalik murabbiyga o‘z jamoasini qurish jarayonini tezlashtirib, osonlashtirib ham beradigandek. Albatta, buning uchun de Yong, Eriksen va Martines transferlari sodir bo‘lishi kerak.

Yana bir jihat. Ronaldu agar Chempionlar Ligasida o‘ynamoqchi ekan, nega bu fikrini aprel oyida emas, mavsumoldi yig‘inlar boshlanayotgan muhim pallada aytmoqda? Hujumchi maqsadi haqida avvalroq bayon qilganda, klub transferlar uchun o‘z prioritetlarini boshqacha tarzda belgilab olishi va shu yo‘nalishda ish olib borishi mumkin bo‘lardi.

Ronalduni «Yunayted»ning transfer bozoridagi passivligi o‘ylantirgan bo‘lsa, hali darcha yopilmadi va klub birdaniga bir necha variantlar ustida ish olib bormoqda.

Yakunda, shunday bo‘lishi mumkinki, Ronaldu qatorasiga ikkinchi bor murabbiy rejalariga pand bermoqda. Esingizda bo‘lsa, Ronalduning Manchesterga kelishi o‘tgan yozning oxirlariga to‘g‘ri kelgan va Sulsher bu holatga moslasha olmay, yakunda jamoa o‘yini inqirozga uchragandi. Chunki, masalan, Sanchoning transferi, Marsiyalning qolishi va boshqa qarorlar olinganda Ronalduning kelishi mumkinligi ko‘zda tutilmagandi.

Qahramon Aslanov tayyorladi.