Prezident kuch tuzilmalarining Nukusdagi harakatlariga baho berishga topshiriq berdi

Prezident Shavkat Mirziyoyev arxitektura, qurilish va shaharsozlik masalalariga bag‘ishlangan yig‘ilishda 1−2 iyul kunlari Qoraqalpog‘istonda yuz bergan namoyishlarga ham to‘xtalib o‘tdi. 

«Albatta, bu voqealar bir kunda yoki o‘n kunda tashkil qilingan emas. Bu harakatlarga chetdagi g‘arazli kuchlar tomonidan yillab tayyorgarlik ko‘rilgan. Ularning asl maqsadi O‘zbekistonning hududiy yaxlitligiga tajovuz qilish va millatlararo nizo keltirib chiqarishga qaratilgan», deydi prezident.

Bo‘lib o‘tgan voqealarni har tomonlama chuqur va xolisona tergov qilish uchun Bosh prokurorning birinchi o‘rinbosari boshchiligida tergov va surishtiruv guruhi ish olib borayotgani, bu jarayonga xolis tomonlarni, ya’ni jamoatchilik vakillari, deputatlar va faollarni ham jalb qilish zarurligi ta’kidlangan.

Bosh prokuror Nig‘matulla Yo‘ldoshevga har bir holat chuqur va xolisona o‘rganilishi va voqea ishtirokchilarining xatti-harakatlariga adolatli huquqiy baho berilishi topshiriq qilingan.

«Shu o‘rinda, kuch tuzilmalarining harakatlari ham chuqur tahlil qilinsin. Agar ular tomonidan noto‘g‘ri kuch ishlatilgan bo‘lsa, amaldagi qonunchilikka asosan ularning ham jinoiy javobgarligi ta’minlansin», degan davlat rahbari.

Hozirgi vaqtda Qoraqalpog‘istondagi vaziyat izga tushayotgani ma’lum qilingan.

«Eng asosiysi, aholining tinchligi va hayotiga hech narsa xavf solayotgani yo‘q.

Iqtisodiyot tarmoqlari ishlamoqda. Odamlar kundalik ishlari va yumushlari bilan band. Dehqonlar o‘z dalasida ishlamoqda, peshona teri bilan yaratgan hosillarini yig‘ishtirmoqda.

Bozorlar, do‘konlar va boshqa xizmat ko‘rsatish obektlari faoliyat yuritmoqda. Mamlakatimizning barcha hududlaridan bu yerga oziq-ovqat va boshqa zarur mahsulotlar yetkazib berilmoqda.

Davlat hokimiyati organlari, jamoatchilik vakillari va huquqni muhofaza qilish tuzilmalari tomonidan hududda barqaror vaziyatni ta’minlash bo‘yicha uyushgan va muvofiqlashgan holda ish olib borilmoqda», deydi Shavkat Mirziyoyev.

Shuningdek, hududlar rahbarlari hushyorlikka chaqirilgan.

«Yuz bergan voqealarni tahlil qilar ekanmiz, biz bir narsani hech qachon unutmasligimiz kerak: agar o‘z vaqtida qat’iy chora ko‘rilmasa, mehnatkash va bunyodkor xalqimiz o‘n yillar davomida mashaqqat bilan erishgan yutuq va marralar g‘arazli tashqi kuchlarning ta’siri bilan jiddiy xavf ostida qolishi mumkin ekan. 

Agar doimo hushyor va ogoh, qat’iyatli bo‘lib ish ko‘rmasak, yurtimiz, xonadonlarimiz tinchligi va osoyishtaligi, farzandlarimiz kelajagi osongina xavf ostida qolishi hech gap emas ekan.

Mana shu haqiqatni, bugungi kunda qanday notinch va murakkab zamonda yashayotganimizni joylardagi barcha rahbarlar yana bir bor har tomonlama chuqur tushunib olishlari lozim», degan prezident.