Maxsus iqtisodiy zonalar ishtirokchilariga qo‘shimcha soliq imtiyozlari beriladi

“O‘zbekiston Respublikasining Soliq kodeksiga qo‘shimcha va o‘zgartishlar kiritish to‘g‘risida”gi qonun senatorlar tomonidan ma’qullandi.

Qonun bilan maxsus iqtisodiy zonalarning ishtirokchilariga ular tomonidan kiritilgan investitsiyalar hajmidan kelib chiqqan holda 3 yildan 10 yilgacha foyda solig‘idan ozod etilishi belgilanmoqda.

Xususan, 3 million AQSh dollaridan 5 million AQSh dollarigacha bo‘lgan miqdordagi investitsiyalar uchun 3 yil muddatga, 5 million AQSh dollaridan 15 million AQSh dollarigacha bo‘lgan miqdordagi investitsiyalar uchun 5 yil muddatga va 15 million AQSh dollari hamda undan yuqori miqdordagi investitsiyalar uchun 10 yil muddatga foyda solig‘idan ozod etilishi yuzasidan Soliq kodeksiga qo‘shimcha kiritilmoqda.

Qonunda maxsus iqtisodiy zonalarning ishtirokchilari tomonidan foyda solig‘i bo‘yicha imtiyozlarning 2020 yil 1 yanvardan keyin foydalanilmay qolgan qismi ham tatbiq etilishi belgilangan.

Qonun qabul qilinishi natijasida maxsus iqtisodiy zona ishtirokchilari o‘z ixtiyorida 47,9 mlrd so‘m mablag‘larni iqtisod qilishi mumkin.