Britaniya sobiq moliya vaziri Konservativ partiya rahbarligi uchun poygada yetakchilik qilmoqda

Boris Jonsonning Konservativ partiya rahbari lavozimida vorisini saylash bo‘yicha ovoz berishning birinchi bosqichida Rishi Sunak partiya a’zolarining eng ko‘p qismining qo‘llab-quvvatloviga ega bo‘ldi.

Foto: Getty Images

13 iyul, chorshanba kuni bo‘lib o‘tgan Konservativ partiya yangi rahbari uchun saylovning birinchi bosqichida Buyuk Britaniya sobiq moliya vaziri Rishi Sunak ko‘pchilik ovozni qo‘lga kiritdi. Torining 358 nafar vakilidan 88 nafari uni qo‘llab-quvvatladi.

Ovoz berish natijalariga ko‘ra, ikkinchi o‘rinda savdo siyosati bo‘yicha kichik vazir Penni Mordaunt 67 ovoz bilan joy oldi. Britaniya tashqi ishlar vaziri Liz Trassni 50 nafar ovoz beruvchi torilar yetakchisi sifatida ko‘rishni istayapti.

Ikki nomzod - Sunak o‘z ixtiyori bilan iste’foga chiqqanidan keyin Boris Jonson tomonidan bu lavozimga tayinlangan moliya vaziri Nadim Zaxavi va sobiq sog‘liqni saqlash vaziri Jyeremi Xant birinchi turda kerakli minimal 30 ovozni to‘play olmadi va poygadan chiqib ketdi. Ovoz berishning navbatdagi bosqichi 14 iyulga belgilangan.

Ovoz berishning yakuniy bosqichi qatnashadigan ikki ishtirokchi kelasi hafta oxirigacha aniqlanishi kutilmoqda. Shunda, Konservativ partiyaning 160 mingga yaqin a’zosi ulardan qaysi biri torining yangi rahbari bo‘lishini va Buyuk Britaniya bosh vaziri lavozimini egallashini aniqlaydi. Ovoz berish natijalari 5 sentabrda e’lon qilinadi.

YouGov instituti tomonidan Konservativ partiyaning 900 ga yaqin a’zosi o‘rtasida o‘tkazilgan so‘rov natijalariga ko‘ra, Penni Mordaunt hozircha g‘alaba qozonish uchun eng yuqori imkoniyatga ega.

7 iyul kuni Boris Jonson Konservativ partiyaning parlament tashkilotchisi sobiq o‘rinbosari Kris Pincher atrofida yuzaga kelgan mojaro fonida Buyuk Britaniya hukumati rahbari lavozimidan ketishini e’lon qildi. Bir necha kun oldin u Londonning «Karlton» elit klubida mushtlashgan edi. Shu bilan birga, Pincher mast holda ikki erkakni haqorat qilgan. Keyinchalik siyosatchi qilmishidan pushaymon bo‘lib, iste’foga chiqdi.

5 iyul kuni Buyuk Britaniyaning o‘sha paytdagi moliya vaziri Rishi Sunak, sog‘liqni saqlash vaziri Sajid Jovid va Konservativ partiyaning bir qator boshqa a’zolari axloqiy asosda iste’foga chiqishlarini e’lon qildi. Ularning ko‘pchiligi bir vaqtning o‘zida mamlakat bosh vaziri Boris Jonsonga ishonchini yo‘qotganliklarini aytishdi.