Qoʻshimcha funksionallar
-
Tungi ko‘rinish
Vladimir Norov ShHTning bloksiz maqomini saqlab qolish muhimligini bildirdi
Shanxay hamkorlik tashkiloti uchun hozirgi murakkab sharoitda ham blokdan tashqari maqomini saqlab qolish muhim.
Bu haqda O‘zbekiston tashqi ishlar vaziri v.b. Vladimir Norov ma’lum qildi.
O‘zbekiston 2022 yilda tashkilotning amaldagi raisi hisoblanadi.
«Kelib chiqayotgan qiyinchilik va chaqiriqlarga qaramay, ShHT uchun blokdan tashqari maqomini saqlab qolish prinsipial ahamiyatga ega», — dedi Norov ShHTni kuchayib borayotgan beqarorlik fonida harbiy tashkilotga aylantirish mumkinmi degan savolga javob berar ekan.
Shu bilan birga, Norov ShHTga a’zo davlatlar uchun hozirda ShHTning yangi chaqiriq va tahdidlarga qarshi kurashda salohiyatini kuchaytirish bilan bog‘liq ustuvor vazifalarni hal etishga e’tibor qaratish muhim ekanini ta’kidladi.
«Davlat rahbarlarining Dushanbe sammitida qabul qilingan ShHTning xavfsizlik sohasidagi mexanizmlarini takomillashtirish to‘g‘risidagi qarorini amalga oshirishni tezlashtirish zarur. O‘zbekiston rossiyalik hamkorlarimiz tomonidan taklif qilingan, Toshkentda Mintaqaviy aksilterror tuzilmasi (MAT) negizida ShHT xavfsizligiga tahdid va chaqiriqlar bo‘yicha universal markazni yaratish muzokaralari jarayonini tezroq boshlash tarafdori», — dedi Norov.
