Ekologiyaga oid qonunchilik hujjatlari talablarini buzgan 25 mingdan ortiq shaxs aniqlandi

Ekologiya sohasiga oid qonunchilik hujjatlari talablarini buzgan 25 395 nafar shaxs aniqlandi. Qonunbuzarlarga 20,9 mlrd so‘m ma’muriy jarima va tabiatga yetkazilgan zarar hisoblanib, 11,4 mlrd so‘mi undirildi.

Foto: AOKA

Bu haqda AOKAda Ekologiya va atrof-muhitni muhofaza qilish davlat qo‘mitasi mutasaddilari ishtirokida o‘tkazilgan matbuot anjumanida ma’lum qilindi.

Daraxt va butalarning noqonuniy kesilishi bilan bog‘liq 2300 ta huquqbuzarlik holati aniqlanib, huquqbuzarlarga nisbatan 3,4 mlrd so‘m ma’muriy jarima va 4,3 mlrd so‘m zarar summalari belgilandi. 2022 yilning 6 oyida jami 882 tup qimmatbaho daraxt kesilgan bo‘lib, o‘tgan yilga (1922 tup qimmatbaho daraxtlar kesilgan) nisbatan 55 foiz kamaygan.

«Yashil makon» umummilliy loyihasi doirasida bahor mavsumida respublika hududida 125 mln 30 ming dona manzarali, mevali daraxt va buta ko‘chatlari hamda qalamchalar ekish rejalashtirilib, amalda 129 mln 608 ming dona ko‘chatlar ekilishi tashkil etilgan.

Yevropa tiklanish va taraqqiyot banki ishtirokida umumiy qiymati 120 mln dollar miqdorida loyihani amalga oshirish bo‘yicha kredit shartnomasi tasdiqlandi. Loyiha natijasida qattiq maishiy chiqindilarning kamida 40 foizini qayta ishlashga erishilib, atmosfera havosiga yiliga 52 ming tonna issiqxona (metan, karbonat angidrid) gazlarning tashlanishi oldi olinadi. Bundan tashqari 203 ta maxsus texnika xarid qilinib, 13 ta servis markazi quriladi.

Chiqindilar bilan ishlash sohasiga davlat-xususiy sheriklik borasida 65 ta tuman va shaharni o‘z ichiga olgan 38 ta bitim imzolangan.