«Barselona» klasikoda yana g‘olib. Benzema yo‘qligida «Real»ni qutqaradigan futbolchi topilmayapti

Nazorat uchrashuvi
«Real» — «Barselona» — 0:1 (0:1)
Gol: Rafinya, 27.
«Real»: Kurtua, Lukas Vaskes (Odriosola, 71), Eder Militao (Valexo, 62), Ryudiger (Mendi, 46), Alaba (Nacho, 46), Kamavinga (Kazemiro, 46), Valverde (Modrich, 46), Tshuameni (Kroos, 46), Rodrigo (Sebalos, 70), Vinisius Junior (M.Dias, 70), Azar (Asensio, 46).
«Barselona»: ter Shtegen (Inyaki Penya, 62) Arauxo (Dest, 63), Erik Garsiya, Kristensen (F. de Yong, 46), Jordi Alba (Aleks Balde 46), Buskets (Niko Gonsales, 63), Gavi (Kesse, 46), Pedri (Serji Roberto, 63), Rafinya (Depay, 63), Ansu Fati (Dembele, 46), Levandovski (Obameyang, 46).

Ispaniyaning yangi mavsumi reklamasi

Yakshanba kuni Las-Vegasda bo‘lib o‘tgan klasiko uchun eng yaxshi ta’rifni Karlo Anchelotti berdi. «Barselona»ga qarshi o‘yin hech qachon o‘rtoqlik o‘yini bo‘lmaydi», — dedi o‘tgan mavsum triumfatori va uning bu so‘zlari haqiqatga yaqin.

Birinchidan, boshqa nazorat uchrashuvlari top darajadagi rasmiy uchrashuvlarga havas qilgan holda shovqin ko‘tarishga yarashi mumkin. Xuddi uch yil oldingi Madrid derbisida bo‘lgani kabi, o‘shanda «Atletiko» safida fantastik o‘yin ko‘rsatib, poker qayd etgan va maydondan chetlatilgan Diyego Kosta ispan gazetalari muqovalarini egallagandi (o‘yin «Real»ning 3:7 hisobidagi mag‘lubiyati bilan yakunlangan).

Ikkinchidan, Amerika zaminidagi klasikoga Ispaniya chempionatining oldinda turgan, aql bovar qilmas intriga va’da qiluvchi mavsumining reklama tizeri sifatida qarash mumkin. Va bularning barchasi «Barsa» olib borgan transfer kampaniyasi samarasidir, klubga yaqin insayderlardan biri bu yozdagi kampaniyani futbol simulyatoridagi vaziyatga qiyosladi.

Bu safar «Real» alohida nuqtalar uchun xaridlar amalga oshirdi va Eden Azarni «aldamchi to‘qqizlik» sifatida o‘ynatib, Karim Benzema uchun yuklamani yengillashtirishni ko‘zlagan. Anchelotti hatto madridliklar uchun transfer kampaniyasi yakuniga yetgani va ularda barchasi ajoyib ekanini aytib chiqdi. «Barsa» esa misli ko‘rilmagan saxiylik attraksioni uyushtirdi va unga uzoq muddatli abonement sotib oldi.

«As-Sadd»dagi faoliyati vaqtida Eronga amalga oshirgan tashriflari tufayli Xavi faqat payshanba kuniga kelib jamoaga qo‘shila oldi, Amerika unga viza berishga shoshilmadi. Lekin murabbiy allaqachon ikkita teng kuchli tarkibga ega bo‘lib ulgurgan. Odatda bunday holatlarda murabbiy uchun yoqimli bosh og‘rig‘i haqida eslatishadi. Ha, jarohatlar bo‘ladi, masalan, Ferran Torres mavsumlar oralig‘idagi ilk mashg‘ulotlardayoq safdan chiqdi, ammo birgina qanot uchun Ansu Fati, Usmon Dembele va Rafinya raqobatlashganda tanlov amalga oshirish oson emas. Yoki hujum markazida Levandovski va Obameyangga bir vaqtning o‘zida joy topib berish.

Maydon markazida ham yuqori raqobat yuzaga kelgan, Gavi, Pedri, Franka Kesse va Serxio Busketsdan tashqari Frenki de Yong ham hamon tarkibda. Unga va Memfis Depayga ketish taklif etilmoqda, ammo bolaligidan «Barsa»ga muhabbat qo‘ygan niderlandiyalik yarimhimoyachi «MYu»ga o‘tishga rozi emas. Endi ko‘k-anorranglilar jamoada eng katta maosh oluvchi (yiliga roppa-rosa 17 million yevro) oluvchi futbolchisini maoshni sezilarli darajada qisqartirishga ko‘ndirmoqchi, qolaversa, undan 20 million yevro qarz ham bor.

Albatta, Yongni saqlab qolish mumkin bo‘lgan variant ham bor. Bu la liga o‘yinlari uchun televizion huquqning yana bir qismini Sixth Street global investitsiya fondiga 400 million yevroga sotish ko‘rinishidagi uchinchi iqtisodiy richag deb ataladi. Bu holda «Barsa» yaqin 25 yillik uchun televizion huquqlarining chorak qismini sotib yuborgan bo‘ladi, ammo rahbariyat hamon ikki niderlandni sotishdan umid qilmoqda. Bu klubga nafaqat qo‘shimcha 100 million yevro atrofida mablag‘ keltiradi, balki maoshlar vedomostini ancha yengillashtiradi, chunki hali Robert Levandovski bilan shartnoma imzolanishi kerak, qolaversa Jyul Kunde transferi kutmoqda — ko‘k-anorranglilar «Chelsi» bilan raqobatda yana bir futbolchini ilib ketmoqda.

Militaoning xatosi

Bu o‘yin uchun boshlang‘ich tarkiblar e’lon qilinganida, diqqatni tortadigan jihat — Levandovski bu o‘yinda debyut qilishi emas, Benzemaning yo‘qligi edi. Fransuz hatto zayavkadan o‘rin olmagandi, shu tufayli hujum markaziga faqat Azar varianti qolgandi. Zarurat tug‘ilganda bu pozitsiyada madridliklar jamoasi yarimhimoyasining yangi yuzlari bo‘lmish Eduard Kamavinga, Orelen Tshuameni va Federiko Valverdedan birortasi paydo bo‘lishi mumkin edi.

Aynan urugvaylik futbolchi jamoasining o‘yindagi ilk xavfli vaziyatini yaratdi, u qaytgan to‘pga jarima maydoni tashqarisidan yo‘llagan zarbasi bilan darvoza ustunini poyladi. Kamavinga esa jarima maydoni ichida yo‘q joydan o‘z darvozasiga gol keltirishiga bir baxya qoldi, u Gavining bosimi ostida to‘pni yo‘qotdi, ammo qulay vaziyatda to‘pni qabul qilib olgan Fatining zarbasi xato ketdi. Bir necha daqiqa o‘tib «Barsa»ning agressiv pressingi natija keltirdi. Shu kunlarda «Real» bilan shartnomani yangilagan Eder Militao bosim ostida to‘pni uzoqlashtirishda sustkashlik qildi va Rafinya bu sovg‘adan foydalanib, to‘pni darvoza «to‘qqizligi»ga mixladi.

Bu gol qisman tasodif bilan urilgan bo‘lsa ham, gol bo‘lishi mantiqiy edi. Kataloniyaliklar yaxshiroq o‘ynashdi, Rafinya esa la liganing bo‘lajak yulduzi maqomi uchun zayavka berdi. Shu bilan birga, braziliyalik hujumchining muvaffaqiyati madridlarni sergak torttirdi, maydonda kurash avj oldi, birinchi bo‘lim yakunida esa maydondagi barcha futbolchilar ishtirokida kichik mushtlashuv kelib chiqdi.

Ikkinchi bo‘lim yoppasiga o‘yinchi almashtirishlar bilan boshlandi, lekin bu o‘yin xarakteriga ta’sir ko‘rsatmadi. «Barsa» to‘p va hududlarni nazorat qildi. «Real» esa Chempionlar ligasi pley-offida muvaffaqiyat qozonish uchun bunga hojat yo‘qligini eslatish bilan band bo‘ldi. Ammo sinalgan retsept bu o‘yinda ish bermadi, Marko Asensio Lukas Vaskesning ideal uzatmasini yo‘qqa chiqardi. Shu bilan birga, birga bir vaziyatda Kesseni to‘xtatgan va Dembelening o‘tkir burchakka yo‘llagan zarbasini olib chiqqan Tibo Kurtua o‘yin oxiriga qadar jamoasiga mag‘lubiyatdan qutulib qolish uchun imkoniyat saqlab turdi.

Ammo Mariano Dias — Benzema emas, shu tufayli u 90-daqiqada yaqqol vaziyatdan foydalana olmaydi. Mart oyida bo‘lgani kabi «Real» fransuz hujumchisisiz klasikoda gol urmasdan yutqazdi. Ha, bu nazorat o‘yini, ammo Las-Vegasdagi o‘yindan keyin ko‘pchilik Ispaniya chempionati startidan uch hafta o‘tib bo‘lib o‘tadigan bahsda «Barsa» foydasiga dov tikish haqida o‘ylay boshladi.