Xalqaro plastik kartalaridan kassa va terminallar orqali naqd valuta yechib olishda komissiya o‘rnatilmoqda

27 iyuldan boshlab “Kapitalbank” Visa xalqaro plastik kartalaridan kassa va terminallar orqali naqd valuta yechib olish uchun 0,7 foizlik, “Ipak yo‘li” bank esa 1 foiz miqdorida komissiya to‘lovi o‘rnatgan.

“Hurmatli mijozlar, sizga shuni ma’lum qilamizki, 2022 yil 28 iyuldan boshlab naqd xorijiy valuta muomalasini tartibga solish maqsadida bank tomonidan "Ipak Yo‘li" bankining Visa/Mastercard/UnionPay kartalaridan "Ipak Yo‘li" bankining kassalaridan va bankomatlaridan naqd pul yechib olish uchun 1 foiz miqdorida komissiya joriy etish bo‘yicha vaqtinchalik qaror qabul qilindi”, deyiladi bank xabarnomasida.

“O‘tgan haftada qator banklarda xalqaro pul o‘tkazmalari bo‘yicha muammolar kuzatila boshlagach, spekulyantlar naqd valuta yechib olish uchun asosiy urg‘uni xalqaro plastik kartalarga qarata boshlashdi. Chunki banklar pul o‘tkazmalari va ayirboshlash shoxobchalari orqali naqd valuta berishda qiyinchiliklarga duch kela boshlagan bo‘lsa-da, xalqaro plastik kartalardan naqd valuta yechishga hech qanday cheklov va komissiyalar o‘rnatishmagandi. Tabiiyki, spekulyantlar endi bu tekin lazeykadan foydalanishga o‘tishdi. Endi buyog‘iga komissiya to‘lash kerak bo‘ladi.

Nazarimda, boshqa bosimga duch kelayotgan banklar ham xalqaro plastik kartalardan naqd valuta yechish uchun komissiya o‘rnata boshlasalar kerak”, deya ushbu holatga munosabat bildirgan iqtisodchi Otabek Bakirov.

Avvalroq, O‘zbekistonning bir nechta banklari naqd valutaga 2-3 ming dollargacha cheklovlar o‘rnatgani haqida xabarlar tarqalgandi. Bu spekulyativ amaliyotlar ko‘payib ketgani bilan izohlangan.