29 iyul kuni bo‘lib o‘tgan Shanxay hamkorlik tashkilotiga a’zo davlatlar tashqi ishlar vazirlari kengashi yig‘ilishidan so‘ng O‘zbekistonning ShHT bo‘yicha milliy koordinatori Rahmatulla Nurimbetov a’zo davlatlar o‘zaro savdoda AQSh dollaridan voz kechishi mumkinligi haqidagi savolga javob berdi.
«O‘zbekiston ShHTdagi raisligida eng ustuvor yo‘nalish iqtisodiy yo‘nalish hisoblanadi. Bu sanoat kooperatsiyasi, ichki savdo, yashil iqtisodiyot va raqamli transformatsiya – bularning hammasi raisligimizning ustuvor yo‘nalishi sifatida konsepsiyada o‘z aksini topgan. Bu borada Samarqanddagi tadbirda yangi hujjatlar qabul qilinishi kutilmoqda.
Bosqichma-bosqich [ShHTga a’zo davlatlar o‘rtasida] milliy valutalar orqali savdoga o‘tish masalasi – bugungi kunda yuzaga kelgan mavzu emas. Bu mavzu ayrim davlatlar tomonidan ShHTda bir necha yillardan buyon ko‘tarib kelinmoqda. Bu borada yakuniy to‘xtamga kelinmagan.
Maxsus bir reja ustida ish olib borilmoqda. Bu qanaqadir yakuniy hujjat emas, buni ishchi dastur desak ham bo‘ladi. Bu dastur hamon tomonlar o‘rtasida ekspertlar darajasida muhokama qilinmoqda», deya O‘zbekiston vakilining so‘zlarini keltirmoqda Kun.uz muxbiri.
