O‘zbekiston Bangladeshda ishlab chiqarilgan dorilarni ro‘yxatdan o‘tkazishni soddalashtiradi

Dakka shahrida kecha savdo-iqtisodiy hamkorlik bo‘yicha O‘zbekiston-Bangladesh hukumatlararo komissiyasi 3-yig‘ilishi bo‘lib o‘tdi, deb xabar qilmoqda “Dunyo”.

Yig‘ilishga O‘zbekiston bosh vaziri o‘rinbosari - investitsiyalar va tashqi savdo vaziri Jamshid Xo‘jayev va Bangladesh savdo vaziri Tipu Munshi raislik qildi.

Tomonlar investitsiyalarni rag‘batlantirish va o‘zaro himoya qilish to‘g‘risidagi bitimni faollashtirishga hamda yuqori qo‘shilgan qiymatga ega mahsulotlar ishlab chiqarish bo‘yicha qo‘shma korxonalar tashkil etilishini rag‘batlantirishga kelishib oldilar. O‘zbekiston va Bangladesh o‘rtasida 2023 yilgacha AKT, charm sanoati kabi yo‘nalishlarda loyihalarni amalga oshirish, tayyor mahsulotlar ishlab chiqarish bo‘yicha O‘zbekiston erkin iqtisodiy zonalarida to‘qimachilik klasterlarini tashkil etishni nazarda tutuvchi sanoat sohasida hamkorlik dasturini ishlab chiqish rejalashtirildi.

Farmatsevtika sohasida o‘zaro hamkorlikni rivojlantirish maqsadida tomonlar O‘zbekiston Farmatsevtika sanoatini rivojlantirish agentligi va Bangladesh Farmatsevtika sanoati assotsiatsiyasi o‘rtasida O‘zbekiston va Bangladeshda ishlab chiqarilgan dori vositalarini ikki mamlakat hududida ro‘yxatdan o‘tkazishni soddalashtirishni nazarda tutuvchi hamkorlik to‘g‘risida memorandumni imzolashga kelishib oldi.

Oziq-ovqat xavfsizligi, shu jumladan urug‘chilik sohasida aniq chora-tadbirlar va amalga oshirish mexanizmlari belgilab qo‘yilgan qo‘shma tadqiqotlar dasturini ishlab chiqish va tasdiqlash hamda o‘simliklar karantini sohasida hamkorlik to‘g‘risida bitimni imzolashni tezlashtirish yuzasidan yakdil qarorga kelindi.

O‘zbekiston va Bangladesh o‘rtasida diplomatik aloqalar o‘rnatilgani 30 yilligi munosabati bilan 2022 yil davomida Bangladeshda O‘zbekiston madaniyati kunlari va O‘zbekistonda Bangladesh madaniyati kunlarini o‘tkazishga kelishildi. 

Turizm sohasidagi hamkorlikni jadallashtirish, "Umra+" dasturi doirasida tranzit yo‘nalishlari bo‘ylab o‘tayotgan Bangladesh ziyoratchilarining O‘zbekiston turizm infratuzilmasidan foydalanish masalalari muhokama qilindi.