Yevroittifoq Ukrainaga 1 mlrd yevro miqdorida makromoliyaviy yordam o‘tkazdi

Yevroittifoq Ukrainaga yangi makromoliyaviy yordam paketidan 1 milliard yevroni to‘liq o‘tkazib berdi. Bu haqda 2 avgust, seshanba kuni Yevrokomissiya raisi Ursula fon der Lyayyen ma’lum qildi.

«Ushbu mablag‘lar Ukrainaga Rossiyaning asossiz tajovuzidan so‘ng o‘zining shoshilinch moliyaviy ehtiyojlarini qondirishga yordam beradi. Bir milliard yevro Ukrainani hal qiluvchi bosqichda mustahkamlaydi», deb yozgan u Linkedin ijtimoiy tarmog‘ida. 

Bosh vazir Denis Shmigal ushbu paketidan Ukrainaga dastlabki 500 million yevro kelib tushganini bir kun avval e’lon qilib, 2 avgustda yana 500 million yevro kutilayotganini ta’kidladi. Bosh vazirning so‘zlariga ko‘ra, bu mablag‘lar «budjetning ustuvor ehtiyojlarini moliyalashtirishga» yordam beradi. 

Yangi makromoliyaviy yordam ko‘rsatish to‘g‘risidagi qaror Yevroparlament va YeI kengashi tomonidan 2022 yil 12 iyulda qabul qilingan. U 2022 yil 18 maydagi YeK xabarida e’lon qilingan va 2022 yil 23-24 iyun kunlari Yevropa kengashi tomonidan tasdiqlangan 9 milliard yevrogacha bo‘lgan favqulodda makromoliyaviy yordam paketining birinchi qismidir. 

Bu milliard yevro YeI yilning birinchi yarmida Ukrainaga ko‘rsatgan yordamga, shu jumladan 1,2 mlrd yevrolik favqulodda kreditga qo‘shiladi. Shu tariqa, urush boshlanganidan beri Ukrainaga ko‘rsatilgan makromoliyaviy yordamning umumiy hajmi 2,2 mlrd yevroga yetdi. 

Mablag‘lar Ukrainaga imtiyozli shartlarda uzoq muddatli kreditlar ko‘rinishida taqdim etiladi.