Qoʻshimcha funksionallar
-
Tungi ko‘rinish
Tayvan Xitoyning «bir davlat - ikki tizim» rejasini rad etdi
«Faqat Tayvan xalqi o‘z kelajagini hal qilishi mumkin», dedi Tayvan TIV vakili. Pekin Pelosining orolga tashrifidan «status-kvoni yo‘q qilish uchun bahona» sifatida foydalanmoqda, dedi u.
Tayvan Pekin tomonidan tinch yo‘l bilan birlashish uchun asos sifatida taklif qilingan «bir davlat - ikki tizim» modelini rad etadi. Bu haqda Tayvan TIV rasmiy vakili Joan Ou 11 avgust, payshanba kuni Taybeyda bo‘lib o‘tgan matbuot anjumanida ma’lum qildi. «Faqat Tayvan xalqi o‘z kelajagini hal qilishi mumkin», dedi u.
Pekin tomonidan taklif qilinayotgan «bir davlat – ikki tizim» modeli Hongkong va Makaoga nisbatan qo‘llanilgan, ularga Xitoy yurisdiksiyasidan o‘tganidan so‘ng keng avtonomiyaga ega bo‘lgan maxsus ma’muriy maqom va’da qilingandi.
AQSh Kongressi Vakillar palatasi spikeri Nensi Pelosining tashrifi munosabati bilan Xitoy orol atrofida boshlagan keng ko‘lamli harbiy mashg‘ulotlarini rasman yakunlaganidan so‘ng, payshanba kuni Tayvan armiyasi navbatdagi jangovar o‘q uzish mashqlarini o‘tkazdi.
Tayvan TIV vakili aytishicha, Xitoy Pelosining tashrifidan «status-kvoni yo‘q qilish uchun bahona sifatida foydalanib, Tayvan xalqini qo‘rqitish maqsadida yangi norma yaratish»ni ko‘zlagan.
Nensi Pelosi 2 avgust kuni Tayvanga bir kunlik tashrif uchun uchib keldi. U 25 yil ichida Pekin mustaqilligini tan olmaydigan va Xitoy provinsiyalaridan deb ko‘ruvchi orolga tashrif buyurgan AQSh Kongressi Vakillar palatasining birinchi spikeri bo‘ldi.
Oq uy va Pelosining o‘zi ta’kidlashicha, Vashington ham mustaqilligini tan olmaydigan Tayvanga tashrif AQSh pozitsiyasi o‘zgarganini anglatmaydi. Rasmiy Pekin shunga qaramay, bunday tashrifni keskin tanqid qildi, Pelosi ketganidan keyin Xitoy armiyasi orol hududida avval e’lon qilingan havo va dengiz harbiy mashg‘ulotlarini boshladi. Tayvan Mudofaa vazirligi Xitoy mashqlarini o‘ta provokatsion deb atadi hamda yerustidan qo‘llaniluvchi raketa tizimlari joylashtirilishini e’lon qildi.
Pekin Pelosining tashrifidan so‘ng Tayvan bilan savdo-sotiqni qisman to‘xtatdi. Bundan tashqari, Xitoy TIV AQSh bilan qator sohalar, jumladan, iqlim o‘zgarishi masalasi bo‘yicha hamkorlikni to‘xtatganini ma’lum qildi. Xitoy Pelosining o‘ziga va uning oila a’zolariga «Xitoyning ichki ishlariga aralashgani» va «mamlakat hududiy yaxlitligini buzgani uchun» sanksiyalar kiritdi.
