Nihoyat, o‘tgan haftadan boshlab, kuchli beshlik ligalarida navbatdagi mavsumga start berildi. Dastlabki turlar jamoalarning mavsumga qay darajada tayyor ekanini kuzatish bilan birga, yangi transferlarga baho berish uchun ham qulay fursat. Biz esa doimiy an’anamizga sodiq qolgan holda yumushingizni osonlashtiramiz va e’tiborga molik uchrashuvlar haqida ma’lumot beramiz.
Foto: Getty ImagesFoto: Getty Images
SeLTA – ReAL MADRID (21 avgustga o‘tar kechasi, 01:00)
Superkubok sohibi La Ligadagi navbatdagi mavsumni u qadar ishonchli boshlamadi – kamtargina «Almeriya»ga safardan faqat 2-taymdagi burilish hisobiga uch ochko bilan qaytildi. Albatta, o‘yin sifati hozirda Anchelottini kamroq xavotirga soladi, asosiysi, kerakli ochkolar yo‘qotilmasligi kerak. Madridliklar mavsumni qatorasiga uch safar o‘yini bilan boshlashmoqda va Vigo safari bu o‘yinlar ichida eng og‘iri bo‘lishi kutilmoqda. «Selta» «Real»ga qarshi oxirgi 4 o‘yinda mag‘lubiyatga uchragan bo‘lsa-da, doim top-klublarga munosib qarshilik qilib kelgan. O‘tgan mavsum Vigoda o‘tgan o‘yinda faqat Benzemaning ikki penaltisi mehmonlarga g‘alaba olib kelgan bo‘lsa, Madriddagi o‘yinda hatto mehmonlar birinchi taymni o‘z foydalariga hal qilgandi. To‘g‘ri, keyinchalik yana o‘sha Benzemaning het-trigi «Real»ga 5:2 hisobidagi g‘alabani taqdim etgandi.
Foto: Getty Images
Yana bir qiziq jihat, «Real» ushbu o‘yin oldidan Kazemiro bilan xayrlashdi. Braziliyalik yarimhimoyachi «Manchester Yunayted» taklifini qabul qildi va bu haqda Karlo Anchelottining o‘zi matbuot anjumanida ma’lum qildi. Futbolchi 1-turda ham maydonga tushmagan, lekin aynan Kazemiro jamoani tark etganidan keyingi yechim ko‘pchilikni qiziqtiradi. Xo‘sh, Tchuameniga birdaniga katta imkoniyat taqdim etiladimi yoki Valverde markazga qaytadimi? Balkim Kroos – Modrich – Kamavinga uchligi yuzaga kelar? Bu savollargi ilk taxminiy javoblarni aynan «Selta»ga qarshi o‘yinda ko‘rishimiz mumkin.
Madridliklar tarkibida Kazemirodan tashqari, Rodrigo va Odriosolalar ham Vigoga bora olishmaydi. Bu futbolchilarda jismoniy toliqish kuzatilgan va kamida bir uchrashuvni o‘tkazib yuborishadi.
«Selta» esa mavsumning dastlabki o‘yinida alamli tarzda g‘alabani qo‘ldan chiqardi. O‘yinning so‘nggi choragigacha ikki to‘p farqi bilan «Espanol»ni mag‘lubiyatga uchratib turgan vigoliklar faqat durang bilan kifoyalanishdi. O‘tgan mavsumni turnir jadvalini ikkinchi yarmida tugatgan «Selta» yozgi transfer darchasini ancha faol o‘tkazmoqda va katta ehtimol bilan jamoadan yaxshiroq natijalarni kutishimiz mumkin. Jamoa safiga «Roma»dan Karlos Peres, «Sevilya»dan Oskar Rodriges va «Atletik»dan Unai Nuneslar ijaraga olib kelindi. Portugaliyalik tajribali hujumchi Gonsalu Pasensiya «Ayntraxt»dan sotib olindi va birinchi o‘yindayoq gol urishga erishdi. «Barselona»ning sobiq futbolchisi Oskar Mingesa esa erkin agent sifatida jamoa safiga kelib qo‘shildi.
VeST HEM – BRAYTON (21 avgust, 18:00)
Mavzuga oid
APL o‘rtamiyonalari o‘rtasidagi bahsga alohida e’tibor uchun yetarli emasdir, ammo aynan mana shu klublar salohiyat borasida yevrokuboklar uchun kurasha oladigan imkoniyatga ega ekanini ham ta’kidlash kerak. «Vest Hem» buni avvalgi mavsumlarda ham isbotladi va hatto bir necha oy YeChL yo‘llanmasi beriladigan o‘rinlarda yurdi. «Brayton» natija borasida biroz oqsagan bo‘lsa-da, mutaxassislar tomonidan yuqori baholanadi va top-klublarni hisobga olmaganda, Angliyada o‘z yuzi va uslubiga ega bo‘lgan jamoa hisoblanadi. Ayniqsa, joriy mavsum «Old Trafford»dagi chiroyli g‘alaba bilan boshlangach, «Brayton»ni Bissuma va Kukurelya kabi futbolchilarning yo‘qotilishi ham u qadar kuchsizlantirmaganini ko‘rsatdi.
«Vest Hem» esa aksincha, biroz yomon boshladi. «Manchester Siti» bilan o‘yindagi mag‘lubiyatni tushunish mumkin, ammo o‘tgan turda «Nottingem Forest» maydonida mag‘lubiyat bilan qaytish og‘ir – jamoa o‘z muxlislari qarshisida aybini yuvishi shart. Zero debyutant bilan o‘yinda ham londonliklar yomon o‘ynashmagandi, kamida uchta golga yetarli vaziyatlar yaratishdi, Rays hatto penaltini golga aylantira olmadi.
O‘tgan mavsumda Londonda bo‘lib o‘tgan to‘qnashuvda 1:1 hisobi qayd etilgan – mehmonlar so‘nggi daqiqalardagi gol evaziga mag‘lubiyatdan qutulib qolgandi. May oyida, mavsumning so‘nggi turlarida o‘tgan javob o‘yinida esa «Brayton» 3:1 hisobida ishonchli g‘alabaga erishgan.
Tarkiblarga kelsak, mezbonlar tarkibida Ogbonna va Dousonning maydonga tushishi so‘roq ostida. «Brayton» safida esa mavsumni boshlagan futbolchilarning hammasi tayyor, o‘tgan mavsum oxirida jarohat olgan Yakub Moder katta ehtimol bilan kelasi yilda maydonga tusha oladi. Ammo jismoniy tayyorgarlik borasida «Vest Hem»da muammolar ko‘zga tashlanishini taxmin qilsa bo‘ladi. Chunki jamoa payshanba oqshomida Yevropa Konferensiyalar kubogida maydonga tushdi. Moyyes to‘liq asosiy tarkibdan foydalanmagan bo‘lsa-da, Souchek, Bouen, Korne, Skamakka, Lansini kabi futbolchilar asosiyda, Antonio, Fornals kabilar esa zaxiradan maydonga tushishdi. Ushbu o‘yinda shuningdek, yaqinda «PSJ»dan transfer qilingan Tilo Kerer ham sinab ko‘rildi va katta ehtimol bilan navbatdagi o‘yinda APLda debyutini o‘tkazsa kerak.
NYuKASL – MANCheSTeR SITI (21 avgust, 20:30)
Angliyada arab derbisi. Saudiyaliklarning «Nyukasli» amirliklarning «Siti»sini qabul qiladi. Mavsum boshida bu jamoalardagi o‘xshashlik yana bor, masalan, dastlabki ikki turdan keyin o‘z darvozasini daxlsiz saqlab kelayotgan ikkitagina klub bor. Topdingiz.
Ko‘pchilik «Nyukasl»dan transfer bozorida faollikni kutgandi. Ammo jimlik. Faqatgina «Byornli» darvozaboni Nik Poup va «Lill»dan markaziy himoyachi Sven Botman sotib olindi. Shuningdek, Mett Target transferi ham amalga oshdi, lekin «Aston Villa» himoyachisi shundog‘am o‘tgan mavsumda ijara asosida «Nyukasl»da to‘p surgandi. Shunday bo‘lsa-da, ushbu mavsumda «Nyukasl»dan yuksalishni kutishga asoslarimiz bor. Birinchidan, qishki tranfer oynasida ham bir qator yangi futbolchilar jalb qilingan va hali ularning ham tarkibga to‘liq moslashishlari davom etmoqda. Ikkinchidan, shu tarkib bilan ham Eddi Hau yomon ishlamayapti, zero agar yanvar oyidan hisoblaydigan bo‘lsak, faqat «Manchester Siti» va «Liverpul» ko‘proq ochko jamg‘argan xolos. Ularniki tushunarli, so‘nggi turgacha chempionlik poygasida qatnashishgan, ammo turnir jadvali o‘rtalarida bo‘lib ham, shuncha ochko to‘plashga motivatsiya mavjud bo‘lgani ham Hauning katta yutug‘idir. Xullas, «Nyukasl» «Manchester Siti»ga osonlikcha ochko bermasa kerak. Buning ustiga o‘tgan mavsumda «shaharliklar» umumiy hisobda 9:0 farq bilan ikki o‘zaro o‘yinni o‘z foydasiga hal qilgandi. Qasos vaqti yetgandir.
Foto: Getty Images
Mehmonlardan esa yana jamoaning Holandga, Holandning esa jamoaga moslashuvini kuzatish qiziq bo‘lmoqda. Birinchi turda aynan norvegiyalik hujumchi barcha masalani hal qilib, ikki gol urgan bo‘lsa, «Bornmut»ga qarshi o‘yinda uning atigi 8 marotaba to‘pga tegingani butun ijtimoiy tarmoqlarni aylanib yurdi. Hozircha biroz tushunarsiz, katta ehtimol bilan hali uzoq vaqt Holandning sermahsul o‘yinlari bilan «Bornmut»ga qarshi bo‘lganidek ko‘rsatkichlari tez-tez almashib tursa kerak.
Tarkiblar borasida mezbonlarda yo‘qotishlar ko‘proq. Pep Gvardiola faqat Emerik Laportning yordamidan foydalana olmaydi va bu mavsum boshlanmasdan oldin ham ma’lum edi. «Nyukasl» tarkibida esa Federiko Fernandes, Rayan Freyzer, Mett Targettlarda kichik jarohatlar bor. Jonjo Shelvi esa dekabrgacha sheriklariga yordam bera olmaydi.
ATLeTIKO – VILYaReAL (21 avgust, 22:30)
«Real» va «Barselona» tushunarli, agar Ispaniyada yana kuzatish qiziq bo‘lgan va bu mavsumdan ko‘p narsa kutilayotgan jamoalar bor bo‘lsa, ularning ruyxati mana shu ikki klubdan boshlanadi.
Simeone har qanday sharoitda ham chempion jamoa tuza olishini ikki yil oldin isbotlagandi va katta ehtimol bilan o‘tgan mavsumdagi izlanishlardan so‘ng, yana yuqori darajaga qaytadi. Jamoa safiga kelib qo‘shilgan Aksel Vitsel esa ayni muddao, jamoa o‘yinida muvozanatni tiklashiga shubha yo‘q. «Xetafe»ga qarshi o‘yinda Simeone shogirdlari o‘ta xotirjam to‘p surishdi. Undanam ko‘ra, Morataning dubli, Felish esa uchta assistni o‘z hisobiga yozib qo‘ygani – katta voqea. Nihoyat oldingi chiziqdagi bog‘lamlar ish berishni boshlagandek.
«Vilyareal» esa Yevropa Ligasidagi g‘alaba hamda Chempionlar Ligasidagi furrordan so‘ng, nihoyat, liga formatida ham barqarorlikni namoyish qilish pallasiga yetib kelgan. Le Chelsoning yana bir yilga tarkibda qolgani, «Uotford»dan Kikoning qo‘shilishi jamoa o‘yiniga rang-baranglik olib kirishi turgan gap. Eng asosiysi, o‘tgan mavsumda YeChL dagi natijalardan so‘ng, ayniqsa, jamoa himoya chizig‘ini top-klublar terib olib ketishi taxmin qilingandi, yo‘q, Pau Torres ham, Foyt ham hozircha o‘z o‘rnida. Pino, Danjuma, Chukveze kabi iste’dodli futbolchilar hamon tarkibda. Aynan mana shu avgustdagi uchrashuvlar balkim «Vilyareal» yuqori o‘rinlar uchun da’vogarlik qila olishini isbotlar va yulduz futbolchilar tarkibda qolishlariga zamin yaratar? Ko‘ramiz.
Bu jamoalar qay darajada bir-biriga mosligini o‘tgan mavsumdagi natijalar ham aytib turibdi: har ikki uchrashuvda bir xil – 2:2 hisobi qayd etilgandi. Umuman aynan Madriddagi o‘yinlarda «Atletiko» ikki o‘yindan beri g‘alaba qozona olmayapti.
Darvoqe, «Vilyareal» ham hafta o‘rtasida, payshanba kuni Konferensiya kubogida «Hayduk»ka qarshi maydonga tushib, 4:2 hisobida g‘alaba qozondi. O‘sha o‘yinda Emeri ba’zi bir asosiy tarkib o‘yinchilaridan foydalanganini e’tiborga olsak, jismoniy tayyorgarlik borasida mezbonlarda biroz ustunlik bo‘ladi.
ATALANTA – MILAN (21 avgust, 23:45)
Uzoq kutilgan chempionlikdan keyin «Milan» o‘yinida pasayish kuzatilishi, kamida, mavsumni biroz og‘ir boshlashi kutilgandi. Lekin aksincha, Pioli shogirdlari «Udineze»ga qarshi o‘yinni yanada quvnoqroq o‘tkazishdi, ayniqsa, o‘tgan mavsumda avvalgi formasiga chiqa olmagan Rebich yana to‘purarlik qobiliyatlarini namoyish eta boshladi. Umuman sentabr oxirlarida bo‘ladigan kichik tanaffusgacha «Milan» eng yuqori formani namoyish qilishga majbur, shundagina yangi mavsumda ham yuqori o‘rinlar uchun asosiy da’vogarlardan biriga aylanadi. Mana shu bir oy ichida milanliklar «Atalanta», «Sassuolo», «Inter» hamda «Napoli»ga qarshi o‘yinlarda maydonga tushishadi. Yaxshi sinov.
«Atalanta» esa imkon qadar tezroq o‘tgan mavsumni unutishi va yana peshqadamlar safiga qo‘shilib olishi shart. Esingizda bo‘lsa, bergamoliklar o‘tgan kuzda hatto chempionlik uchun da’vogarlar safida tilga olingan, Chempionlar Ligasidagi guruhda ham favorit edilar. Lekin birdaniga hammasi teskari ketdi va «Atalanta» hatto 8-o‘ringa tushib ketdi. Bir tomondan Gasperini uchun mana shu holat, ya’ni boshqalar katta natijalar kutmayotgan paytda yangi jamoa qurib olishi qulay. Jamoa o‘tgan turda «Sampdoriya» maydonida ishonchli g‘alabaga erishdi, xavfli vaziyat yaratish borasida ham, o‘yin nazoratida ham yaqqol ustunlik qilib, o‘sha eski «Atalanta»ni eslatib yubordi. Jamoa tarkibiga «Leypsig»dan kelib qo‘shilgan, o‘z vaqtida «Lester» va «Fulhem» safidagi o‘yinlari bilan bizga tanish bo‘lgan Ademola Lukman esa zaxiradan maydonga tushib, gol muallifi bo‘ldi. Yangi qahramoningni kutib ol, Bergamo!
Jarohatlar haqida so‘z boradigan bo‘lsa, «Milan» safida faqat Zlatan Ibrahimovich sheriklariga yordam bera olmaydi. U yana kamida ikki oy maydonga tusha olmasligi mumkin. «Atalanta» esa Demiral, Zappakosta va Edersonlarning yordamidan foydalana olmaydi.
O‘zaro o‘yinlarga ahamiyat qaratsak, so‘nggi o‘n yillikda deyarli tenglikni kuzatishimiz mumkin. Oxirgi 20 o‘yindan 7 tasini «Atalanta», 7 tasini «Milan» g‘alaba qozongan. 6 o‘yin durang bilan yakunlangan. Shu o‘rinda, qatorasiga 3 o‘yindan beri milanliklarning qo‘li baland kelayotganini ham ta’kidlash joiz. Aynan Bergamodagi oxirgi g‘alaba 2019 yilning dekabriga to‘g‘ri keladi. O‘shanda «Atalanta» raqibini 5:0 hisobida yanchib tashlagandi.
MANCheSTeR YuNAYTeD – LIVeRPUL (22 avgust, 23:55)
Shunday bo‘lishi mumkinki, bu turdan keyin, masalan, durang o‘ynaydigan bo‘lishsa, har ikki klub turnir jadvalida xavfli zonada joylashib qoladi. Tasavvur qilish qiyin. Ammo aytish kerakki, «Yunayted»ning ikki mag‘lubiyatini «Liverpul»ning ikki durangi bilan taqqoslab bo‘lmaydi. Ten Hag shogirdlari dastlabki ikki turda umuman ligadagi eng yomon o‘yinni namoyish qilishgan bo‘lsa, «Liverpul»ga shunchaki, omad kelmayapti.
Boshqa tarafdan, «Liverpul»dan omad bir ketsa, anormal darajadagi natijalarga sabab bo‘lishini ham ko‘rganmiz. Esingizda bo‘lsa, ikki yil oldin «Liverpul» o‘yin sifati, yaratilgan vaziyatlar borasida yuqori saviyani namoyish etgan bo‘lsa-da, gol urishga qiynalgan va qatorasiga bir nechta o‘yinlarni boy bergandi. O‘sha kunlar bilan yana bir o‘xshashlik – hozir ham jamoa jarohatlar girdobida qolgan. Sadio Maneni o‘rnini to‘ldirish bilan shug‘ullanilishi kerak bo‘lgan paytda, tarkibdagi hujumchilar ham safdan chiqishmoqda – Jota jarohatlangan, Firmino bu o‘yinga safga qaytishi kutilayotgan bo‘lsa-da, qanday formada bo‘lishi noma’lum. Darvin Nunez esa «Kristal Pelas»ga qarshi uchrashuvda qizil kartochka oldi va keyingi uchta o‘yinni o‘tkazib yuboradi. Shuningdek, Jons, Oksleyd-Chemberlen va Matiplar ham sheriklariga yordam bera olishmaydi. To‘g‘ri, shu holatda ham bugungi «Manchester»dan kuchli tarkib tuzish qiyin emas, lekin «Old Trafford»da har narsa kutish mumkin.
Foto: Getty Images
«Manchester Yunayted»ga tayyorlanish qiyinroq bo‘lishini Kloppning o‘zi ham tan oldi – «men 0:4 hisobidagi mag‘lubiyadan keyingi emas, 5:0 g‘alabadan keyingi «MYu»ga osonroq tayyorlangan bo‘lardim» – dedi u. Rostan ham, g‘alabadan so‘ng, hech narsa o‘zgartirilmaydi, mag‘lubiyatlardan keyin esa hammasi, Ten Hagning qog‘ozdagi rejalari ham havoga uchdi. Katta ehtimol bilan «Brayton»dan keyin Fred – Maktominey, «Brentford»dan so‘ng esa Fred – Eriksen juftligiga boshqa qaytilmaydi, u holda maydon markazi qanday ko‘rinish oladi? O‘z vaqtida «Ayaks»da yarimhimoyada to‘p surgan Martines suriladimi yoki yetarlicha markaziy himoyachilar borligidan foydalanib, 3-5-2 sinab ko‘riladimi, qorong‘u. «MYu»ning yangi xaridi Kazemironing bu o‘yinda maydonga tushmasligi aniq.
Xullas, «Yunayted» oldida xuddi «Nyukasl» kabi o‘tgan mavsumdagi umumiy 0:9ni qasosini olish, «Liverpul» uchun esa mavsum boshidan chempionlik poygasidan chiqib ketmaslik uchun ham ilk g‘alabani kechiktirmaslik vazifasi turibdi.
BOShQA O‘YINLAR
20 avgust. TOTTeNHEM – Vulverhempton (16:30), BORUSSIYa D – Verder (18:30), Bornmut – ARSeNAL (21:30), Yunion Berlin – RB Leypsig (21:30), Torino – LATsIO (21:30), INTeR – Spetsiya (23:45)
21 avgust. Lids – CheLSI (18:00), Boxum – BAVARIYa (20:30), NAPOLI – Monsa (21:30), Lill – PSJ (23:45), Real Sosedad – BARSeLONA (22 avgustga o‘tar kechasi, 01:00)
22 avgust. ROMA – Kremoneze (21:30), Sampdoriya – YuVeNTUS (23:45).
