O‘zbekistonlik talabalarning Rossiyada sarson bo‘lishi sababi ma’lum qilindi

Ijtimoiy tarmoqlarda Farg‘ona jamoat salomatligi tibbiyot instituti talabalari bo‘lgan yigit-qizlar Rossiyaning Kuban davlat tibbiyot universitetiga yuborilib, ko‘chada qolayotgani bo‘yicha videomurojaati chiqqandi.

Talabalar aytishicha, stomatologiya va davolash ishlari fakultetida o‘qish 3+2 shaklidagi qo‘shma dastur asosida tashkil etilgan. Talabalar 3 yil O‘zbekistonda, 2 yil esa Rossiyada tahsil olishi kerak bo‘lgan. Lekin talabalar bir qismiga Kuban davlat tibbiyot universiteti rad javobini bergan.

Farg‘ona jamoat salomatligi tibbiyot instituti rahbariyati izohiga ko‘ra, 2019-2020 o‘quv yilidan boshlab institut Rossiyaning Kuban davlat tibbiyot universiteti bilan hamkorlikda qo‘shma ta’lim tashkil qilgan.

2019 yil 27 martda tuzilgan shartnomaga muvofiq, o‘qishga qabul qilingan talabalar uchun stomatologiya yo‘nalishi uchun 3 yil O‘zbekistonda, 2 yil Rossiyada o‘qish belgilangan. Unga ko‘ra, 2019-2020 o‘quv yilida stomatologiya yo‘nalishiga 50 nafar talaba qabul qilingan.

Ma’lum qilinishicha, 2021-2022 o‘quv yili yakuni bo‘yicha stomatologiya yo‘nalishida tahsil olgan 46 nafar, Davolash ishi yo‘nalishida tahsil olgan 40 nafar talabalar 3-bosqichni bitirib, 2022 yil 21 avgust kuni Kuban davlat tibbiyot universitetiga o‘quv-uslubiy bo‘lim boshlig‘i G.Mamatxanova, Xalqaro fakultet dekani M.Ashurova, dekan o‘rinbosari A.Abdug‘aniyevalar boshchiligida yuborilgan.

Institut ma’muriyati bergan xabariga ko‘ra, stomatologiya yo‘nalishiga qabul qilingan talabalarning ayrimlari Kuban davlat tibbiyot universiteti imtihonidan o‘tolmagani uchun qabul qilinmagan.

“Joriy yil 25 avgust kuni Kuban davlat tibbiyot universitetida Farg‘ona jamoat salomatligi tibbiyot instituti stomatologiya yo‘nalishi 3-bosqichni bitirgan talabalaridan imtihon olingan. O‘tkazilgan imtihon natijalariga ko‘ra, stomatologiya yo‘nalishida tahsil olayotgan 46 nafar talabalardan 25 nafari belgilangan ballni olib, o‘qishni davom ettirishga tavsiya etilgan. Qolgan 21 nafar talabalar belgilangan balldan past baxo olib, imtihondan o‘ta olmagan”, – deyilgan xabarda.

Biroq videomurojaatda aytilishicha, talabalar olingan imtihon ularning o‘qishga qabul qilinishiga ta’sir qilmasligiga ishontirilgan.

Institut imtihondan o‘tolmagan talabalarning Kursk davlat tibbiyot universitetida o‘qishini davom ettirishi, bunda kontrakt miqdori o‘zgarmasligi va talablarning borish-kelish xarajatlari institut tomonidan qoplab berilishini ma’lum qilgan.