10:38 / 07.09.2022
21437
Ўзини ўзи банд қилган ҳайдовчилар лицензияни қаердан ва қай тартибда олади?

Ҳайдовчи солиқ инспекцияси ҳудудий бўлимига бориб, ўзини ўзи банд бўлган шахс сифатида рўйхатдан ўтади ва гувоҳнома олади (рўйхатдан ўтиш ва гувоҳнома олиш бепул). Сўнг ДХМга бориб, гувоҳномага асосан йўловчи ташиш лицензиясини олиш учун 1 йилга 300 минг сўм давлат божи тўлаб, лицензия олади.

2022 йил 1 сентябрдан 2024 йил 31 декабргача фуқаролар ўзини ўзи банд қилган шахс сифатида рўйхатдан ўтиб, енгил автомобилда йўловчи ташиш фаолиятини амалга оширишига рухсат берилди.

Бунинг учун ҳайдовчи аввало ўзини ўзи банд бўлган шахс сифатида рўйхатдан ўтиши лозим. Буни ягона портал орқали масофадан ёки Давлат солиқ инспекцияси ҳудудий бўлимига борган ҳолда амалга ошириш мумкин. Рўйхатдан ўтган фуқароларга гувоҳнома берилади. Рўйхатдан ўтиш ва гувоҳнома олиш бепул.

Сўнгра ҳайдовчи ягона портал орқали масофадан ёки Давлат хизматлари марказига бориб, гувоҳномага асосан йўловчи ташиш лицензия варақаси олиш учун 1 йилга 300 минг сўм давлат божи тўлаб, лицензия варақаси олади. Шунда, ҳайдовчи жами бўлиб 1 йилга 300 минг сўм сарф қилади. Агар лицензия ягона портал орқали олинса, 10 фоиз чегирма берилади, яъни давлат божи 270 минг сўмни ташкил этади.

Kun.uz шуни қўшимча қиладики, агар ўзини ўзи банд қилган шахс сифатида рўйхатдан ўтган ҳайдовчи расмий иш стажига эга бўлишни истаса, ихтиёрий равишда 1 йил учун 300 минг сўм ижтимоий солиқ тўлаши мумкин. Такрорлаб ўтамиз, ижтимоий солиқ тўлаш ўзини ўзи банд қилганлар учун ихтиёрий саналади.

Шу билан бирга, ўзини ўзи банд қилган таксичилар:

  • такси белгили плафон олиб, автомобилининг том қисмига ўрнатиши керак (таксида плафон бўлмаса, бу 300 минг сўмдан 900 минг сўмгача жарима солишга сабаб бўлади – МЖтК 1764-моддаси 2-қисми);
  • 1 йилда 1 марта тиббий кўрикдан ўтиши керак;
  • 1 йилда 1 марта автомобилини техник кўрикдан ўтказиши керак.

Киракаш жисмоний шахслар автомобилини сариқ рангга бўяшлари мажбурий эмас.

Top