Yaqinda Toshkentda taksi haydovchisi va yoʻlovchi oʻrtasidagi mojaro jiddiy tus olib, haydovchining kaltaklanishi va unga kuch ishlatgan shaxsning qamoqqa olinishi bilan yakunlandi. Bu holat taksi haydovchilarining ish jarayonidagi xavfsizligi va yoʻlovchilar bilan munosabat masalasini yana bir bor kun tartibiga chiqardi. Kun.uz poytaxtdagi taksi haydovchilaridan ular duch kelayotgan muammolar haqida soʻradi.

Taksi haydovchisi va yoʻlovchi oʻrtasidagi kelishmovchiliklar har doim ham yoʻl haqi yoki manzil bilan bogʻliq boʻlmaydi. Haydovchilarning aytishicha, mashinada belgilanganidan ortiq yoʻlovchi olib ketish, bolalarning nazoratsiz qolishi, salonda ovqatlanish va chekish, shuningdek, mast yoʻlovchilar bilan bogʻliq holatlar ular uchun eng koʻp uchraydigan muammolardan.

  • “Masalan, kecha olti kishi chiqishdi mashinaga “men oʻzim javob beraman” deydi. Jarima borligini aytsam tushunishmayapti, men jarima toʻlashim ham ularga qiziqmas”.
  • “Yoʻlovchida muomala boʻlsa, haydovchidayam muomala boʻladi. Mashinani toza tutish kerak, narsa yeb-ichib chiqindini tashlab ketishadi”.
  • “Ayol kishi bolalari bilan chiqadi. Bola toʻpolon qiladi tushunarli. Lekin ular telefon bilan band boʻlib oʻtirishadi. Bola shoʻx, qarash kerak. Eshikni ochib yuboradigan boʻlsa, bolaga nimadir boʻlsa haydovchi aybdor boʻladi. Bizda masʼuliyat ogʻir. Biz bolaga qaraylikmi yoki yoʻlga qaraylikmi? Oʻsha paytda bolaga qarash kerakligini aytsangiz ularga yoqmaydi, jahli chiqadi”.
  • “Baʼzilar oʻzidan juda “osmon” yasab olgan boʻladi. Shundan muammo chiqadi hamisha”.
  • “Men A nuqtadan B nuqtaga mijozni ehtiyot qilib olib borib qoʻyapman. Boʻldi, mening vazifam shu. Unga ortiqcha nimadir qilib berish majburiyatiga ega emasman. “Pulingni toʻlab qoʻyapman” deb janjal koʻtaradiganlar juda koʻp boʻladi. Shu narsa taksistlarda koʻp uchraydigan holat”.
  • “Koʻpchilik taksida yurish madaniyatini bilmaydi, oʻzimizda hali bu madaniyat rivojlanmagan. Mashinada ovqat yeb ketadiganlar bor. Bu juda xunuk holat, baʼzilar chiqadi shashlik yeydi, sigaret chekadi. Bu undan keyin chiqadigan mijoz uchun yoqimsiz holat”.
  • “Manzilni aytishadi narxini talashib-tortishib, keyin masofadan aldaydi. Bunaqa nohaqliklar juda koʻp, shuning uchun 80 foiz shofyorlarning asabi tarang. Mast odamlar chiqadi – pul berib ham tushira olmaysiz”.