Moskva munitsipal deputatlari Putindan iste’foga chiqishni so‘radi

8 sentabr kuni «Lomonosovskiy» Moskva munitsipal okrugi deputatlari kengashi Rossiya prezidenti Vladimir Putindan iste’foga chiqishni so‘radi. Moskva mundeplarining prezidentga e’lon qilingan murojaatida hokimiyat o‘zgarishi mamlakatning muvaffaqiyatli rivojlanishi uchun muhim ekani aytiladi, Putin uchun esa ikkinchi muddatdan keyin «hamma narsa qandaydir tarzda noto‘g‘ri ketdi: YaIM oshmadi, minimal ish haqi e’lon qilingan raqamlarga yetmadi, aqlli va mehnatga layoqatli odamlar Rossiyani ommaviy tark etyapti, va’da qilingan barqarorlik ko‘rinmayapti».

«Siz va sizning qo‘l ostidagilaringiz ishlatayotgan ritorika uzoq vaqt davomida murosasizlik va tajovuzkorlik bilan o‘ralgan edi, bu oxir-oqibatda mamlakatimizni Sovuq urush davriga qaytardi. Rossiyadan yana qo‘rqib, nafratlana boshlashdi, biz yana butun dunyoni yadro quroli bilan qo‘rqitmoqdamiz», - deb davom etadi «Lomonosovskiy» MO deputatlari. 

Ular Putinning qarashlari va uning boshqaruv modeli «umidsiz ravishda eskirgan hamda Rossiya va uning inson salohiyati rivojlanishiga to‘sqinlik qilmoqda», degan xulosa kelishdi. Shu munosabat bilan Moskva mundeplari Rossiya prezidentidan «o‘zini o‘zi egallab turgan lavozimdan ozod qilishni» so‘rashdi.

8 sentabr kuni bo‘lib o‘tgan o‘sha yig‘ilishda Lomonosovskiy okrugi deputatlari Moskva meri Sergey Sobyaninga ham murojaat qabul qilishdi. Ularning ta’kidlashicha, Moskvada mahalliy o‘zini o‘zi boshqarish tizimi amalda ishlamayapti, tuman darajasida ikki tomonlama hokimiyat rivojlangan, bu esa mahalliy aholi va ular vakillarining har qanday tashabbuslariga to‘sqinlik qilmoqda.  

7 sentabr kuni Sankt-Peterburgning «Smolninskoye» munitsipaliteti kengashi deputatlari Davlat dumasini Putinni ishdan bo‘shatishga chaqirishgandi. Ularga ko‘ra, Rossiya prezidenti Putinning harakatlarida Rossiya konstitutsiyasining davlatga xiyonat haqidagi moddasida nazarda tutilgan jinoyat belgilari mavjud. Xususan, ular Rossiya armiyasining jangovar tayyor bo‘linmalarining yo‘q qilinishi, Rossiyaning yosh va mehnatga layoqatli fuqarolarining o‘limi va jarohati, Rossiya iqtisodiyotiga yetkazilgan zarar, Ukrainadagi «maxsus operatsiya»dan so‘ng yuz bergan NATOning kengayishi va Ukraina armiyasi zamonaviy G‘arb texnikasi bilan jihozlanayotganiga e’tibor qaratmoqda. Bu - uning «demilitarizatsiya» maqsadiga ziddir. 

So‘ng, Sankt-Peterburgning «Smolninskoye» munitsipal okrugi kengashining Davlat dumasini Putinni iste’foga chiqarishga chaqirgan deputatlari politsiyaga chaqirildi – «hokimiyatni obro‘sizlantirish» to‘g‘risida protokol tuzildi.