Erdo‘g‘an Samarqandda Putin bilan Ozarboyjon va Armaniston o‘rtasidagi to‘qnashuvlarni muhokama qiladi – OAV

Turkiya prezidenti Rajab Toyyib Erdo‘g‘an Rossiya prezidenti Vladimir Putin bilan Armaniston-Ozarboyjon chegarasidagi jangovar harakatlarni muhokama qiladi. Bu haqda Reuters o‘z manbasiga tayanib xabar berdi.

Xabarda aytilishicha, ikki mamlakat prezidentlari Samarqand shahrida bo‘lib o‘tadigan ShHT sammiti doirasidagi uchrashuvda ushbu masalani muhokama qiladi.

ShHTning Samarqand sammitida O‘zbekiston, Rossiya, Xitoy, Hindiston, Pokiston, Qozog‘iston, Qirg‘iziston, Tojikiston, Belarus, Eron, Mo‘g‘uliston, Turkiya, Ozarboyjon, Turkmaniston va Armaniston yetakchilari ishtirok etishi kutilmoqda.

13 sentabrga o‘tar kechasi Armaniston Ozarboyjon bilan chegarada harbiy harakatlar boshlaganini ma’lum qildi. Armaniston mudofaa vazirligi Ozarboyjon tomoni artilleriya, minomyot, dron va yirik kalibrli o‘q otish qurollaridan foydalanganini bildirdi.

Yerevan e’lon qilgan ma’lumotlarga ko‘ra, mamlakatning Vardenis, Sotk, Artanish, Ishxanasar, Goris va Kapan aholi manzillari Ozarboyjon kuchlari hujumi ostida qolgan.

Armaniston bosh vaziri Nikol Pashinyaning so‘zlariga ko‘ra, harbiy to‘qnashuvlar davomida 105 nafar arman harbiysi halok bo‘lgan.

Avvalroq Turkiya prezidenti Rajab Toyyib Erdo‘g‘an O‘zbekistondagi muzokaralar chog‘ida rossiyalik hamkasbi Vladimir Putin bilan Ukraina donini eksport qilish bo‘yicha kelishuvni muhokama qilish niyatida ekanligi haqida xabar berilgandi.