Toshkent shahrida Litva faxriy konsulxonasi ochilish marosimi bo‘lib o‘tdi, deb xabar bermoqda "Dunyo".
Litva tashqi ishlar vaziri o‘rinbosari Mantos Adomenas ta’kidlashicha, faxriy konsulxona ishga tushirilishi o‘zaro hamkorlikni kengaytirish, ta’lim, turizm, madaniyat sohalarida, ikki mamlakat ishbilarmon doiralari vakillari o‘rtasida yaqin aloqalarni mustahkamlash orqali yangi imkoniyatlar ochadi.
U vazirliklararo siyosiy maslahatlashuvlar navbatdagi raundi yakunlari bo‘yicha erishilgan kelishuvlar hayotga samarali tatbiq etilishiga umid bildirdi.
22 sentabr kuni mamlakat Tashqi ishlar vazirligida O‘zbekiston-Litva vazirliklararo siyosiy maslahatlashuvlari navbatdagi raundi bo‘lib o‘tdi. Unda O‘zbekiston va Litva tashqi ishlar vazirlari o‘rinbosarlari G‘ayrat Fozilov va Mantos Adomenas boshchiligidagi delegatsiyalar tomonlarni qiziqtirgan turli sohalardagi ikki tomonlama munosabatlar holati va istiqbollarini muhokama qildi.
