09:14 / 27.09.2022
11014
Pink Floyd асосчиси Путинга очиқ хат ёзди

Рожер Уотерс Путинни урушни тугатишга чақирди. Аввалроқ мусиқачи АҚШ ва НАТОни босқинчиликда айблаган эди.

Фото: The star

Pink Floyd мусиқачиси ва асосчиси Рожер Уотерс Россия президенти Владимир Путинга очиқ хат йўллаб, Украинадаги урушни тугатишга чақирди. У ўз мурожаатини 26 сентябр, душанба куни Facebook'даги саҳифасида эълон қилди.

«Мендан сизга хат ёзишимни сўрашяпти. Биринчидан, уруш тугашини хоҳлайсизми? Агар «Ҳа» деб жавоб берсангиз, бу вазифани дарҳол сезиларли даражада осонлаштиради», деб ёзган Уотерс. Унинг сўзларига кўра, агар Путин «Россиянинг Қрим, Донецк ва Луҳанск русийзабон аҳолиси хавфсизлигидан бошқа ҳудудий манфаатлари йўқлигини» айтадиган бўлса, бу урушни тугатишга ёрдам беради.

«Мен баъзи одамларни биламан, улар сиз Полша ва Болтиқбўйи бошқа давлатларидан бошлаб бутун Европани эгаллаб олмоқчисиз, деб ўйлайди. Агар шундай бўлса, сизга бошқа гапим йўқ. Ҳаммамиз Атлантика океанининг икки томонидаги қирғийларга жуда қулай бўлиб туюлган ўта хавфли ядровий ўйинни ўйнашни тўхтатишимиз лозим. Шунчаки бир-бирингизни ва дунёни парчалаб ташланг. Муаммо шундаки, менинг болаларим ва невараларим бор. Дунё бўйлаб кўплаб ака-ука ва опа-сингилларим каби, бундай якун ҳеч биримизга ёқмайди», деб ёзган Уотерс.

Мусиқачининг қўшимча қилишича, Украина билан тинчлик битими тузилса, Россия бошқа жойни босиб олмасликка ваъда бериши керак. «Мен биламан, АҚШ ва НАТО бошқа суверен давлатларга кўз очиб юмгунча ёки бир неча баррель нефть учун бостириб киришади, лекин бу сиз ҳам шундай қилишингиз керак, дегани эмас. Украинага бостириб кирганингиз мени ҳайратда қолдирди, бу даҳшатли босқинчилик уруши», деб ёзади у.

Август ойида Уотерс АҚШ президенти Жо Байденни Украинада уруш бошлаганликда айблаб, «Украинада олов қўзғатгани» учун «ҳарбий жиноятчи» деб атаган эди. У, шунингдек, уруш асосан Россия чегараларига яқинлашиб қолган НАТО ҳаракатларига Москванинг муносабати билан боғлиқ, деган фикрни билдирганди.

Сентябрь ойида мусиқачи Украина президенти Володимир Зеленскийнинг рафиқаси Елена Зеленскаяга иккита очиқ хат ёзиб, уни эрини «тўғри иш қилишга» мажбурлаб, Россия билан музокаралар олиб боришга ундаган.

Зеленская бунга жавобан Уотерсга «Россия Украинага ҳужум қилди, шаҳарларни вайрон қилди ва одамларни ўлдирди», деб эслатган.

«Украиналиклар ўз ватанларини ва фарзандларининг келажагини ҳимоя қилмоқда. Агар биз жанг қилишдан бош тортсак, эртага йўқ бўламиз. Агар Россия жанг қилишдан бош тортса, уруш тугайди. Бошқа давлат президентидан тинчлик сўрашингиз керак», - деб ёзган Зеленская.

Мавзу
Россия-Украина уруши
2022 йил 22 феврал куни Россия Украина чегарасидан ўтиб, қўшни мамлакатга бостириб кирди. Украина армияси жанг таклиф қилди.
Барчаси
Top