Polshada Baltic Pipe gaz quvuri ochildi

Polshaning Golenyuv shahrida Norvegiyadan Polsha, Daniya va qo‘shni davlatlarga gaz yetkazadigan Baltic Pipe gaz quvurining ochilish marosimi bo‘lib o‘tdi. Bu haqda 27 sentabr, seshanba kuni Yevrokomissiya saytida xabar berildi.

Yangi gaz quvurida har yili Norvegiyadan Polshaga 10 milliard kub metrgacha gaz importi va Polshadan Daniyaga 3 milliard kub metr gazni olib o‘tish rejalashtirilmoqda, deb xabar berdi Yevrokomissiya. 2022 yilning 1 oktyabriga gazni quyishni boshlash rejalashtirilgan.

Daniyaning Energinet energetika kompaniyasi gaz quvuri noyabr oyi oxirigacha to‘liq quvvat bilan ishlay olishini bildirdi.

«Baltic Pipe quvuri mintaqadagi ta’minot xavfsizligini ta’minlashga qaratilgan asosiy loyiha va Yevropa ittifoqining gaz manbalarini diversifikatsiya qilish siyosati natijasidir. Quvur joriy energetika inqirozi oqibatlarini yumshatishda muhim rol o‘ynaydi», - dedi energetika bo‘yicha yevrokomissar Kadri Simson.

«Rossiyaning gaz sohasida hukmronlik davri yakunlanmoqda. Shantaj, tahdid va tovlamachilik bilan ajralib turadigan davr», - dedi Polsha bosh vaziri Mateush Moravetskiy Euronews'ga ochilish marosimida bergan intervyusida.

Rossiyaning Ukrainaga bostirib kirishi boshlanishidan oldin Rossiyadan gaz Yevropaga «Shimoliy oqim» gaz quvuri orqali yetkazilgan. Bundan tashqari, Rossiyadan Germaniyaga «Shimoliy oqim-2» gaz quvuri qurib bitkazildi va ishga tushirishga tayyorlandi. U ishga tushirilmadi, Germaniya Rossiyaning o‘zini o‘zi mustaqil deb e’lon qilgan «DXR» va «LXR»ni tan olishiga javoban sertifikatlash jarayonini to‘xtatdi.

Urush boshlanganidan so‘ng, «Shimoliy oqim» orqali gaz yetkazib berish davom etdi, Rossiya u orqali gaz oqimini dastlab qisqartirdi, keyin yagona ishlaydigan turbinaning ishlamay qolganligini aytib, butunlay to‘xtatdi. Yevropa Rossiya gazdan shantaj uchun foydalanmoqda, deya ma’lum qildi.

Sentabr oyining oxirida Boltiq dengizi tubi bo‘ylab o‘tadigan ikkala gaz quvurida ham sizib chiqish yuz berdi, natijada ulardagi bosim nolga tushib ketdi. Shvetsiya va Daniyadagi seysmologik stansiyalar sizib chiqqan hududda kuchli suvosti portlashlarini qayd etgan. Sizib chiqish sabablari hali aniqlanmagan, ammo ba’zi dalillar sabotaj ehtimolidan dalolat beradi, dedi Daniya va Germaniya huquq-tartibot idoralaridagi dpa manbalari.