SSVda vazir maslahatchisi yangi lavozimi kiritiladi

Prezidentning “Sog‘liqni saqlash boshqaruv organlarini takomillashtirish chora-tadbirlari to‘g‘risida”gi qarori loyihasi e’lon qilindi.

Sog‘liqni saqlash tizimini boshqarish va rejalashtirish bo‘yicha konsepsiya hamda strategik maqsadlarni ishlab chiqish, sohadagi islohotlarning to‘liq shaklda amalga oshirilishi kuzatuvini ta’minlash maqsadida vazirlik markaziy apparati tuzilmasiga sog‘liqni saqlash vazirining sog‘liqni saqlash islohoti va axborot texnologiyalari bo‘yicha maslahatchisi lavozimi kiritiladi.

Sog‘liqni saqlash vaziri mazkur lavozimga sog‘liqni saqlash sohasida boshqaruv va islohotlarni amalga oshirish bo‘yicha tajribali va yetuk xorijiy mutaxassisni jalb qiladi.

Davlat budjeti hisobidan moliyalashtiriladigan Sog‘liqni saqlash vazirligi markaziy apparati boshqaruv xodimlari cheklangan soni 203 nafar, sog‘liqni saqlash hududiy boshqaruv organlari xodimlari cheklangan soni - 586 nafar etib belgilanadi.

Jahon sog‘liqni saqlash tashkiloti tavsiyalari asosida respublikada bosqichma-bosqich tibbiy sug‘urta tizimi joriy etilayotgani munosabati bilan 1 sentabrdan Sog‘liqni saqlash vazirligi markaziy apparati tuzilmasida 10 ta shtat birligidan iborat Tibbiy sug‘urta departamenti hamda sog‘liqni saqlash tizimidan tugatilayotgan shtat birliklari hisobidan Moliya vazirligi markaziy apparati tuzilmasida 5 ta shtat birligidan iborat Tibbiy sug‘urta bo‘limlari tashkil etiladi.