MRB sobiq rahbari NATO Rossiya yadroviy zarbasiga qanday javob qaytarishini aytdi

Rossiya prezidenti Vladimir Putinning Ukrainada yadro qurolidan foydalanish tahdidiga jiddiy munosabatda bo‘lish kerak, dedi Markaziy razvedka boshqarmasi sobiq direktori Devid Petreus 2 oktyabr, yakshanba kuni Amerikaning ABC telekanaliga bergan intervyusida. 

U AQSh prezidentining milliy xavfsizlik bo‘yicha maslahatchisi Jyeyk Sallivan bilan Oq uyning Rossiya yadroviy zarbasiga ehtimoliy javobini muhokama qilmaganini ta’kidladi, ammo AQSh va NATOning javobi qanday bo‘lishi mumkinligini aytdi. 

«Sizda ma’lum bir tasavvurni uyg‘otish uchun tushuntiraman: biz Ukraina va Qrimdagi jang maydonida ko‘rishimiz va aniqlashimiz mumkin bo‘lgan har qanday an’anaviy rus kuchlarini va Qora dengizdagi har bir kemani yo‘q qiladigan NATOning jamoaviy sa’y-harakatlariga rahbarlik qilish orqali javob beramiz», dedi Petreus. 

Markaziy razvedka boshqarmasi sobiq rahbari teleboshlovchining Rossiya tomonidan yadro qurolidan foydalanish ehtimolidan keyin NATO davlatlari hududiga radiatsiya tarqalishini Shimoliy Atlantika alyansi a’zosi bo‘lgan davlatga hujum sifatida baholash mumkinligi haqidagi so‘zlariga qo‘shildi. «Bu javobsiz qolishi mumkin emas», dedi Petreus va AQSh hamda NATO yadroviy keskinlikning oldini olishiga ishonishini qo‘shimcha qildi. 

Hatto Putinning Ukrainada yadro qurolidan foydalanishi ham jang maydonidagi vaziyatni o‘zgartirmaydi, deydi Devid Petreus. Unga ko‘ra, Ukraina hududini annexia qilishga urinish Putinning «umidsiz» qadamidir. «U yutqazmoqda. U jang maydonida duch kelayotgan voqelik, menimcha, orqaga qaytmas. Hech qanday safarbarlik yoki annexia, hatto yashirin yadro tahdidi ham uni bu vaziyatdan olib chiqa olmaydi», - dedi Markaziy razvedka boshqarmasi sobiq direktori. 

Petreusning so‘zlariga ko‘ra, so‘nggi yetti oy ichida Ukraina o‘z armiyasini «Rossiyaga qaraganda beqiyos yaxshi darajada» safarbar qilgan, jihozlagan, o‘qitgan va tashkil etgan, buning natijasida Ukraina qurolli kuchlari hozirda Rossiyanikidan «kattaroq va ancha samaraliroq».

«Ayni paytda u (Putin) bu borada hech narsa qila olmaydi. Jang maydonidagi mag‘lubiyatlar davom etadi. Yagona savol shundaki: biz qachon alohida askarlar va bo‘linmalar taslim bo‘lishini emas, balki ko‘proq yirik tuzilmalarning qulashini ko‘ra boshlaymiz? Menimcha, bu yaqinlashmoqda», deb prognoz qildi Devid Petreus. 

«Putin, xuddi Rossiya Napoleon va natsistlar bilan bo‘lgani kabi, Yevropadan ko‘proq «azob chekishi» mumkinligiga ishonadi, lekin u muvaffaqiyatga erishadi, deb o‘ylamayman. Yevropani og‘ir qish kutyapti, gaz ta’minoti kamayadi, lekin u buni yengib o‘ta oladi va Ukrainani qo‘llab-quvvatlashdan bosh tortmaydi», deya qo‘shimcha qildi Petreus.